މި މައްސަލައާއި ގުޅޭ ގޮތުން ރައްޔިތުންގެ ކަންބޮޑުވުންތަކަށް ޖަވާބު ދެއްވުމަށް، މިރޭ ރައީސް އޮފީހުގައި ކުރިއަށް ދިޔަ ނޫސްވެރިންގެ ބައްދަލުވުމުގައި ޕަޔަމް ވަނީ، މިކަން ވަރަށް ތަފްސީލީކޮށް ކިޔައިދީފަ އެވެ. އަދި މިކަމުގެ ސަބަބުން ރާއްޖެއަށް ގެއްލުމެއް ނުވާނެ ކަމަށް އެބޭފުޅާ ވަނީ ވިދާޅުވެފަ އެވެ.
ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޕަޔަމް ވިދާޅުވީ، އިޓްލޮސްގައި ކުރިއަށްދާ ބޯޑަރުގެ މައްސަލަ ކޮންމެ ގޮތަކަށް ނިމުނު ކަމަށް ވިނަމަވެސް އެކަމުގެ ސަބަބުން ދިވެހި ރާއްޖޭގެ އިގްތިސާދީ ސަރަހައްދު ނުގެއްލޭނެ ކަމަށާއި، ދެ ގައުމަށް އެއްބަސްވުމަކަށް ނާދެވިގެން އުޅެނީ، ދެ ގައުމުގެ އިގްތިސާދީ ސަރަހައްދު ފުށުއަރާ ހިސާބު ބަހާނެ ގޮތަކާއި މެދު ކަމަށެވެ.
ޕަޔަމް ވިދާޅުވީ، ކަނޑުގެ ސަރަހައްދު ބެހުމުގައި ބަލާ ހާއްސަ އުސޫލުތަކެއް ހުންނަ ކަމަށާއި، ކަނޑުގެ ސަރަހައްދު ބަހާ އިރު، އެއް ގައުމަކަށް ހުރިހާއެއްޗެއް އެއްކޮށް ނުލިބޭނެ ކަމަށެވެ. އަދި ބައެއް ފަރާތްތަކުން ގަބޫލުކުރާ ގޮތުގައި، ފުށުއަރާ ސަރަހައްދު ރާއްޖެއަށް އެއްކޮށް ލިބެންޖެހޭ ކަމަށާއި، އެހެން ނަމަވެސް އެއީ އެކަން އޮންނަ އުސޫލު ނޫން ކަމަށެވެ. އަދި މިހާރު ސުވާލު އުފެދިގެން އުޅެނީ، ދެގައުމުގެ ސަރަހައްދުން ފުށުއަރާ 100،000 އަކަ ކިލޯ މީޓަރުގެ ތެރެއިން 4000 ވަރަކަށް އަކަ ކިލޯ މީޓަރުގެ ސަރަހައްދަކާއި މެދު ކަމަށްވެސް ޕަޔަމް ވިދާޅުވި އެވެ.
މީގެ އިތުރުން އޭނާ ވިދާޅުވީ، އެހެން އެއްވެސް ގައުމަކާއި ފުށުނާރާނަމަ ކޮންމެ ގައުމަކަށްވެސް އިގްތިސާދީ ހާއްސަ ސަރަހައްދު ކަމުގައި ބައިނަލްއަގުވާމީ ގޮތުން ކަނޑައަޅާފައި އޮންނަ 200 މޭލު އެއްކޮށް ލިބޭނެ ކަމަށާއި، އެހެން ނަމަވެސް ކިރިޔާވެސް އެހެން ގައުމަކާއި ފުށު އަރާނަމަ ހެދިފައިވާ ގަވައިދުތަކާއި، އެކުލެވިފައިވާ އުސޫލުތަކާއި އެއްގޮތަށް އެތަން ބަހަން ޖެހޭނެ ކަމަށެވެ. އަދި އެއީ، އިގްތިސާދީ ސަރަހައްދު ގެއްލިގެން ދިއުން ނޫން ކަމަށްވެސް ޕަޔަމް ވިދާޅުވި އެވެ.
ނޫސްވެރިންގެ ބައްދަލުވުމުގައި ނޫސްވެރިން ކުރި ސުވާލަށް ޖަވާބު ދެއްވަމުން ޕަޔަމް ވިދާޅުވީ،ހިޔާލު ތަފާތުވެފައިވާ ސަރަހައްދު ބަހަން ޖެހިގެން އުޅެނީ ރާއްޖޭން އދ. ގައި ދޭ ވޯޓުގެ ސަބަބުން ނޫން ކަމަށާއި، ދިވެހިރާއްޖޭން މޮރިޝަސް ބޭނުން ވާ ގޮތަށް އެގައުމާއި އެއްކޮޅަށް ވޯޓު ދޭން ނިންމުމަކުން މިހާރު ޓްރައިބިއުނަލްގައި ހިނގާ މައްސަލަ އަށް އެއްވެސް ބަދަލެއް ނާންނާނެ ކަމަށެވެ.
