ރާއްޖޭގެ އެންމެ ދެކުނަށް އޮތް ޗާގޮސް އައިލެންޑްގެ ރަށްތަށް އިނގިރޭސި ވިލާތުގެ އިސްތިއުމާރު ނިމުމަކަށް ގެނެސް އެ ރަށްތައް މޮރިޝަސްއާ ހަވާލުކުރުމަށް އިންޓަނޭޝަނަލް ކޯޓް އޮފް ޖަސްޓިސް އައިސީޖޭން 2019 ގައި ނެރުނު އެޑްވައިޒަރީ އޮޕީނިއަންގައި ކަނޑައަޅާފައިވަނީ ޗާގޮސް އާކިޕެލާގޯއަކީ މޮރިޝަސްގެ ސިޔާދަތީ ބާރުގެ ދަށުގައިވާ ތަނެއްކަމަށެވެ.
އެހެންނަމަވެސް އެ ލަފާ ތަންފީޒުކުރުމަށް ގޮވާލައި އދ.ގެ އާންމު މަޖިލީހަށް ހުށަހެޅި ހުރިހާ ގަރާރަކަށް ހުރިހާ މި ވީހާތަނަށް ރާއްޖޭން ވަނީ ދެކޮޅުހަދައިފަ އެވެ. އެހެންނަމަވެސް މި ވިސްނުން ބަދަލުކޮށްފައިވާކަން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ ގައި ހިނގަމުންދާ ރާއްޖެ-މޮރިޝަސް އިމުގެ މައްސަލާގައި ރާއްޖޭން ވަނީ ހާމަކޮށްފަ އެވެ.
މިކަމާއި ގުޅިގެން ރާއްޖޭގެ ބޮޑު ސަރަހައްދެއް ގެއްލޭނެ ކަމަށް ބުނެ ގިނަބަޔަކު އަންނަނީ ކަންބޮޑުވުން ފާޅުކުރަމުންނެވެ.
މިކަމާއި ގުޅިގެން ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވީ، ފޯޅަވަހި އަކީ މިވަގުތު ވަކި ގައުމެއްގެ ތަނެއް ނޫން ކަމަށާއި، އެތަން ބަލަހައްޓަނީ އިނގިރޭސިން ކަމަށެވެ.
އަދި ފޯޅަވަހި އެއީ ރާއްޖޭގެ ތަނެއް ނޫން ކަމަށް ބުނެވޭނެ ޖާގައެއް ނެތް ކަމަށްވެސް ރައީސް ނަޝީދު ވިދާޅުވި އެވެ.
މީގެ އިތުރުން ރައީސް ނަޝީދު ވިދާޅުވީ، ދިވެހި ނެވިން ރާއްޖޭގެ ސަރަހައްދު ބަޔާން ކުރަނީ ފޯޅަވަހި އާއި އެކު ކަމަށާއި، ފޯޅަވައްސަކީ ރާއްޖޭގެ ރަށެއް ކަމަށް ބުނުމަށް ކިތަންމެ ތާރީހީ އަދި ސަގާފީ ގުޅުމުގެ ހެކި އެބަހުރި ކަމަށެވެ.
