އެ ނިންމުން ނިންމާފައިވަނީ، ރޭ ބޭއްވި އެޕާޓީގެ ގައުމީ ހިންގާ ކައުންސިލްގެ ފުރަތަމަ ބައްދަލުވުމުގަ އެވެ. އެގޮތުން އެކަމަށް ދެ ހުށަހެޅުމެއް ހުށަހަޅާ މަޝްވަރާކޮށްފައި ވެއެވެ.
ކައުންސިލް ބައްދަލުވުމަށް ހާޒިރުވެތިބި ބޭފުޅުންގެ އިއްތިފާގުން ފާސްވެފައިވަނީ އަންނަ ޑިސެމްބަރު މަހުގެ އެއްވަނަ ދުވަހު ޕްރައިމަރީއަށް އިއުލާންކޮށް، އަންނަ އަހަރުގެ ޖެނުއަރީ 14 ވަނަ ދުވަހު ޕާޓީގެ ރިޔާސީ ޕްރައިމަރީ ބޭއްވުމަށެވެ.
މިހާތަނަށް އެމްއެންޕީގެ ފަރާތުން ރައީސްކަމަށް ކުރިމަތިލުމުގެ ޝައުގުވެރިކަން ފާޅުކުރައްވާފައިވަނީ އެ ޕާޓީގެ ރައީސް، ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމް އެވެ. ގައުމަށް ކުރެވުނު ދުމަތަށް ބަލާއިރު ދެން ހަވާލުވާން އޮތް މަގާމަކީ ރާއްޖޭގެ ރައީސްކަމުގެ މަގާމުކަން ގަބޫލުކުރެވޭ ކަމަށް އޭނާ މީގެ ކުރިން ވަނީ ވިދާޅުވެފަ އެވެ.
ރޭގެ ބައްދަލުވުމުގައި ޕާޓީގެ ގައުމީ ހިންގާ ކައުންސިލުން ވަނީ ޕާޓީގެ ހިންގުމަށް މުހިއްމު ނިންމުންތަކެއް ނިންމާފައެވެ.
އެގޮތުން ސިޔާސީ މައިދާނުގައި އެމްއެންޕީގެ ސްޓޭންޑް ކަނޑައަޅައި، ސަރުކާރު ޒިންމާދާރުކުރުވާ އިދިކޮޅު ޕާޓީއެއްގެ ގޮތުގައި އެމްއެންޕީ އޮތުމަށް އެ ބައްދަލުވުމުގައި ނިންމާފައެވެ.
އެމްއެންޕީ އުފެއްދުމަށް އީސީއަށް ފޯމު ހުށަހަޅާފައިވަނީ ޕާޓީގެ މަސްއޫލުވެރިއެއް ގޮތުގައި ހުންނަވާ ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަހްމަދު އުޝާމްއެވެ. ޕާޓީ ހިންގުމަށް ހުއްދަދީފައިވަނީ، ޖުލައި މަހުގެ 15 ވަނަ ދުވަހުއެވެ.
އެ ޕާޓީއަކީ ކާނަލް ނާޒިމާއި، އަބްދުﷲ ރިޔާޒްއާއި، މުހައްމަދު ނަޝީދު އަބްދުﷲ ގެ އިތުރުން އަބްދުލް މުހުސިން ހަމީދު އާއި ގުޅިގެން އުފައްދާފައިވާ ޕާޓީއެކެވެ.
ޕާޓީ ރަޖިސްޓްރީވެ، އެޕާޓީން ފުރަތަމަ ކުރިމަތިލީ މަޖިލީހުގެ ކޮމަންޑޫ ދާއިރާއަށެވެ. ނަމަވެސް އެ އިންތިހާބު ކާމިޔާބުވެފައެއް ނުވެއެވެ.