މަޖިލީހުގެ އިދާރާއިން ނެރުނު ނޫސްބަޔާނެއްގައި ވާގޮތުން އެ ސަމިޓުގައި ރައީސް ނަޝީދު މިފަހަރު ތަމްސީލުކުރައްވާނީ ލަންކާ އެވެ. 

ޑިމޮކްރެޓިކް ސޯޝަލިސްޓް ރިޕަބްލިކް އޮފް ސްރީލަންކާގެ ގައުމީ ވަފުދުގެ މެންބަރެއްގެ ގޮތުގައި އެ ސަމިޓަށް ރައީސް ނަޝީދު ފުރާވަޑައިގެންނެވީ މިއަދު ހެނދުނެވެ. މަޖިލީހުން ބުނިގޮތުގައި މިއަދުން ފެށިގެން މިމަހުގެ ނުވަވަނަ ދުވަހާއި ހަމައަށް ރައީސް ނަޝީދު ކުރައްވާ މިދަތުރުފުޅަކީ ރަސްމީ ދަތުރުފުޅެކެވެ. 

މި ދަތުރުފުޅުގައި މިސްރުގައި ބާއްވާ ކްލައިމެޓް ޕްރޮސްޕެރެޓީ ޕްލޭންސް ފްލެގްޝިޕް އިވެންޓުގައި ރައީސް ނަޝީދު ބައިވެރިވެވަޑައިގަންނަވާނެ އެވެ. 

މި ބައްދަލުވުމަކީ ކްލައިމެޓް ވަނަރަބްލް ފޯރަމް(ސީވީއެފް) އަދި ވަނަރަބަލް ގުރޫޕް އޮފް 20(ވީ 20) އިންތިޒާމުކޮށްގެން ބާއްވާ ބައްދަލުވުމެކެވެ. 

ރާއްޖެއަކީ ވެސް ސީވީއެފް މެމްބަރު ގައުމެކެވެ. ރާއްޖޭގެ ފަރާތުން ސަމިޓުގައި އިންނަވާނީ ނައިބު ރައީސް ފައިސަލް ނަސީމެވެ.

ކޮޕް 27 ސަމިޓުގައި ރައީސް ނަޝީދު ލަންކާ ތަމްސީލުކުރައްވާއިރު، މޫސުމީ ކަންކަމުގައި ސްރީލަންކާގެ ރައީސް ރަނިލް ވިކްރަމަސިންހައަށް ލަފާދޭ ފަރާތެއްގެ ގޮތުގައި ރައީސް ނަޝީދު މިދިޔަ މަސްތެރޭ ލަންކާގެ ސަރުކާރުން ވަނީ ހަމަޖައްސާފަ އެވެ.

މީގެ ކުރިން އެގައުމުގެ އިގްސޯދީ ހާލަތު ރަނގަޅުކުރުމަށް ބޭރު ފައިސާ ހޯދުމަށް ބައިނަލް އަގުވާމީ އެހީ ހޯދުމުގެ މަސައްކަތުގައި އިސްކޮށް ހަރަކާތްތެރިވާ ބޭފުޅެއްގެ ގޮތުގައި ވެސް ނަޝީދު ވަނީ އައްޔަންކުރައްވާފަ އެވެ.