މިއަދު ހެނދުނުން ފެށިގެން ކުރިއަށްދާ ޕީޕީއެމް/ޕީއެންސީ ކޯލިޝަނުގެ ދާއިރާ އިންތިހާބުގައި މާލެ ސަރަހައްދުގެ ވޯޓުލުން ކުރިއަށްދާ ހެންވޭރު ދަނޑަށް ވަޑައިގަތުމަށްފަހު މީޑިއާތަކާއި ވާހަކަފުޅު ދައްކަވަމުން ރައީސް ޔާމީން ވިދާޅުވީ، އެ އިންތިހާބަކީ ރިޔާސީ އިންތިހާބު ކާމިޔާބު ކުރުމަށް މުހިންމު އިންތިހާބެއް ކަމަށެވެ.
ރައީސް ޔާމީން ވިދާޅުވީ މިއަދު ބާއްވަމުންދާ އެޕާޓީގެ އެތެރޭގެ އެ އިންތިހާބަކީ ރިޔާސީ އިންތިހާބުގެ ކުރިން އޮންނާނެ އެންމެ މުހިންމު އިންތިހާބު ކަމަށެވެ.
މިއަދު ވޯޓަކުން ނިންމިގެން ދަނީ ދާއިރާތަކުގެ އިސްވެރިން ކަމަށާއި، ދާއިރާތަކުގައި ހިނގާ ހުރިހާ ސިޔާސީ ހަރަކާތެއް ހިނގާނީ އެ ރައީސުންގެ ބެލުމުގެ ދަށުން ކަމަށެވެ.
އޭނާގެ ކޮނޑުގައި އެޅޭ މުހިންމު ޒިންމާގެ ދަށުން މާލެ އާއި ރަށްރަށުގައި ހިންގާ ޕީޕީއެމްގެ ސިޔާސީ ހުރިހާ ހަރަކާތްތަކެއްގެ ބޭނުމަކީ، 2023 އާއި ދޭތެރޭ ރާއްޖެ މިނިވަން ގައުމަކަށް ހެދޭތޯ އެޕާޓީން ކުރާ މަސައްކަތްކަމަށްވެސް ރައީސް ޔާމީން ވިދާޅުވި އެވެ.
މި އިންތިހާބުގެ ވޯޓުލުން ކުރިއަށްދާނީ ހަވީރު 16:00 ހަމައަށެވެ.
