ރައީސް ޔާމީން މިހެން ވިދާޅުވީ، ޕީޕީއެމްގެ ދާއިރާތަކުގެ އިންތިހާބުގައި ވޯޓުލުމަށްފަހު މީޑިއާތަކަށް ދެއްވި އިންޓަވިއުގައި ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުން ނެވެ.
ޕީޕީއެމްގެ އިންތިހާބަކީ ޑިމޮކްރަސީއާއި ދުރު އިންތިހާބުތަކެއް ކަމަށް އެމްޑީޕީން ފާހަގަކުރާ ކަމަށް ނޫސްވެރިއަކު ފާހަގަކުރުމާއިއެކު ރައްދުގައި ރައީސް ޔާމީން ވަގުތުން ވިދާޅުވީ، ގައުމު ވިއްކާލައިގެން ތިބެ އެމްޑީޕީއަށް ޑިމޮކްރަސީގެ ވާހަކަ ނުދެެއްކޭނެ ކަމަށެވެ.
ޗާގޯސް މައްސަލައަށް އިޝާރާތްކުރައްވާ ރައީސް ޔާމީން ވިދާޅުވީ، އެމްޑީޕީ އަކީ މުޅި ގައުމު ވިއްކާލައިގެން ތިބި ބައެއް ކަމަށާއި، އެމްޑީޕީގެ ލަދެއްގެ ކަންފުޅެއް ހުރިނަމަވެސް މިވަގުތު ކުރަންވީ ކަމަކީ ޑިމޮކްރަސީގެ ވާހަކަ ނުދައްކާ ގޭގައި އޮތުން ކަމަށެވެ.
ރައީސް ޔާމީން އިތުރަށް ވިދާޅުވީ، ޕީޕީއެމްގެ ދާއިރާ އިންތިހާބަކީ ވަރަށް ޑިމޮކްރަޓިކް އިންތިހާބެއް ކަމަށާއި، އެއްވެސް ދާއިރާއެއްގެ ކެންޑިޑޭޓަކަށް ނުވަތަ ވަކި ކެންޑިޑޭޓަކަށް ތާއީދުކޮށް އެ ކޯލިޝަނުގެ އެއްވެސް އިސް ލީޑަރަކުވެސް ދާއިރާގެ ރައީސްއަކު ހޮވަން އެ އިންތިހާބުގައި މަސައްކަތްކޮށްފައި ނުހުންނާނެ ކަމަށެވެ.
ޕީޕީއެމްގެ މިއަދުގެ އިންތިހާބު ބަލައި، އެމްޑީޕީންވެެސް އެޕާޓީގެ މަގުޗާޓު ކުރިއަށް ގެންދިއުމަށް ރައީސް ޔާމީން އެދިވަޑައިގަތެވެ.
