ބަޖެޓު ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ބަހުސް ކުރަމުން ދެއްކެވި ވާހަކައިގައި މެމްބަރު އާޒިމް ވިދާޅުވީ މިއަދު ދިވެހިންގެ ހާލަތު ވަރަށް ދަށަށް ގޮސްފައިވާ ކަމަށާއި، މަހުގެ މިހާތަނަށް އަންނަ އިރު އަތުގައި 100ރފ އޮތް މީހަކުވެސް މަދުވާނެ ކަމަށެވެ.
އަދި މިހާރު ކޮންމެ މީހަކުވެސް، އެމީހެއްގެ އެކުވެރިން ކައިރިން އެހީއަށް އެދި ސަލާން ޖަހަމުންދާ ކަމަށާއި، މިއަދު ދިވެހިންގެ ހާލަތު ވަރަށް ދަށަށް ގޮސްފައިވާ ކަމަށްވެސް އާޒިމް ވިދާޅުވި އެވެ.
މަޖިލީހުގައި އިތުރަށް ވާހަކަފުޅު ދައްކަވަމުން އާޒިމް ވިދާޅުވީ، ބަޖެޓް ކޮމިޓީން އެވަރަށް ވިސްނާނުލާ ފުރިހަމައަށް ދިރާސާ ކުރުމެއްނެތި ހުށަހެޅި ގޮތަށް ބަޖެޓް ފާސްކުރާނީ ރައްޔިތުން ނިކަމެތި ކުރަން ކަމަށެވެ.
މީގެ އިތުރުން އޭނާ ވިދާޅުވީ، ގައުމުގެ މަސްލަހަތަށްވުރެ އަމިއްލަ މަސްލަހަތު އިސްކޮށްގެން ކުރާ ކަންކަމުގެ ނަތީޖާ ފަހުން ހިތިވާނެ ކަމަށާއި، އެކަމުގެ ގެއްލުން އޭރުން ލިބޭނީ ހުރިހާ ރައްޔިތުންނަށް ކަމަށެވެ.
އަދި މިކަންކަމަށް ވިސްނާ، މިހާ ދަރަނި ބޮޑު ބަޖެޓެއް މަޖިލީހުން ފާސްކުރަން ހެޔޮވެސް ނުވާނެ ކަމަށް އާޒިމްގެ ވާހަކަފުޅުގައި ވިދާޅުވި އެވެ.