ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީގައި ވާހަކަފުޅުދައްކަވަމުން ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވީ، މުއްސަނދިންނާއި ފަޤމގީރުންނަށް އެއްހަމައަކުން އާސަންދަ ދެމުން އަންނަ އައުން ބަދަލުކުރުމަށް ހާއްސަ ގާނޫނެއް އަންނަ އަހަރު އެކުލަވާލާނެ ކަމަށެވެ.
އެކަމަށްޓަކައި ސޯޝަލް ޕްރޮޓެކްޝަން އެކްޓްގެ ބިލު އެކުލަވާލުމުގެ މަސައްކަތް މިހާރު ކުރަމުން އަންނަކަމަށާއި، އަންނަ އަހަރުގެ ތެރޭގައި އެ ބިލު މަޖިލީހަށް ހުށައަޅުއްވާނެކަމަށް މިނިސްޓަރު ވިދާޅުވި އެވެ.
މީގެ އިތުރުން މިނިސްޓަރު ވިދާޅުވީ އެ މިނިސްޓްރީ އާއި ކަމާ ގުޅޭ އިދާރާތައް ގުޅިގެން މިހާރު އަންނަނީ ނޭޝަނަލް ސޯޝަލް ޕްރޮޓެކްޝަން ފްރޭމް ވޯކް އެކުލަވާލުމުގެ މަސައްކަތް ކުރަމުން އަންނަ ކަމަށެވެ. އަދި މިކަމުގެ ސަބަބުން އާސަންދަ ހިދުމަތް ދެމުން އަންނަ އުސޫލަށް ބޮޑު ބަދަލެއް އަންނާނެކަމަށް ވަނީ ވިދާޅުވެފަ އެވެ.
