މިއަދުގެ ޖަލްސާ ފައްޓަވަމުން މަޖިލީހުގެ ހާޒިރީ އިއުލާން ކުރެއްވިއިރު ރައީސް ނަޝީދު ވިދާޅުވީ، މިއަދު މަޖިލީހަށް ހާޒިރުވެފައިވަނީ އެންމެ 22 މެމްބަރުން ކަމަށާއި، އޭގެތެރެއިން ބައެއް ބޭފުޅުންނަށް ހާޒިރުވެވުނީވެސް ގަޑިޖެހިގެން ކަމަށެވެ.
ޖުމްލަ 87 މެމްބަރުން ތިއްބަވާ މަޖިލީހުގެ ޖަލްސާގައި 65 މެމްބަރުން ކޮންމެ ދުވަހަކު ކަހަލަ ގޮތަކަށް މަދުވެ އެވެ. މިއަދުވެސް 65 މެމްބަރުން މަޖިލީހަށް ހާޒިނުވެއެވެ.
ރައީސް ނަޝީދު ވިދާޅުވިގޮތުން:
- ކޮންމެ އިއްޒަތްތެރި މެމްބަރަކަށްވެސް އިންތިހާއަށް މުސާރަ ލިބިވަޑައިގަންނަވާ
- ކޮމިޓީ އެލަވަންސް އެހާމެ ގިނައިން ލިބިވަޑައިގަންނަވާ
- މެމްބަރެއްގެ މުސާރައިގެ ގޮތުގައި 80،000 އަށްވުރެ ގިނަ ރުފިޔާ ގެއަށް ގެންދަވާ
މިއަދު މަޖިލީހުގެ ރިޔާސަތުން އަންގާ އެންގުމުގެ ގޮތުގައިވެސް ރައީސް ނަޝީދު އެދިވަޑައިގަތީ މަޖިލީހުގެ ޖަލްސާތައް އޮންނަ ދުވަސްދުވަހު މަޖިލީހަށް މެމްބަރުން ވަޑައިގަތުމަށެވެ.
ކޮންމެ މެމްބަރަކަށް މުސާރަ ލިބޭގޮތް:
- ޒިންމާއެއް އަދާކުރިއަސް ނުކުރިއަސް މަހެއްގެ މައްޗައް ޖުމްލަ 82،000 ރުފިޔާ ގެއަށް ގެންދެވޭ
- މުސާރައިގެ ގޮތުގައި 42،000 ރުފިޔާ ލިބިވަޑައިގަންނަވާ
- ހައުސިން އެލަވަންސަށް 20،000 ރުފިޔާ،
- ކޮމިޓީ އެލަވަންސަށް 20،000ރުފިޔާ ލިބޭ
- މުޅި މަޖިލީހުގައި 87 މެމްބަރުން ތިއްބަވާއިރު މިއިން ކޮންމެ ބޭފުޅެއްގެ މައްޗަށް 7،156،625 (ހަތް މިލިއަން އެއް ލައްކަ ފަންސާސްހަހާސް ހަސަތޭކަ ފަންސަވީސް) ރުފިޔާ އަށް ވުރެ ގިނައިން ދައުލަތުން ހޭދަވެގެންދޭ
ރައްޔިތުންގެ މަޖިލީހަކީ ދައުލަތުގެ ތިން ބާރުގެ ތެރެއިން އެއް ބާރެވެ. ގާނޫނުތަކަށް އިސްލާހު ގެނެސް، ގަވާއިދުތަކާއި ގާނުނުތައް ފާސްކޮށް ރައްޔިތުންނާއި ގައުމަށް ބޭނުންވާ މުހިންމު ނިންމުންތައް ނިންމުމުގައި މަޖިލީހުގެ ދައުރު ވަރަށް މުހިންމެވެ. މަޖިލީހުގެ މައްޗަށް އިސްކޮށްފައިވާ ޒިންމާބޮޑެވެ. ނަމަވެސް ދައުރު ނިމިގެންދާއިރު ޖަލްސާތަކަށް ހާޒިރުވަނީ މަދު މެމްބަރެކެވެ.
ޒިންމާ އަދާނުކުރައްވާ މުޅި އަހަރު ޗުއްޓީ ނަންގަވާގެން ރިސޯޓުތަކުގައި ތިއްބަވާ މެންބަރުންނަށް ވެސް ރައްޔިތުންގެ ޖީބުން ކާންދޭންޖެހޭކަމުގެ ކަންބޮޑުވުންތައް އޮތުމުން އެފަދަ މެމްބަރުން ވަކިކުރަން ވޯޓު ދިނުމުގެ ބާރު ރައްޔިތުންނަށް ލިބޭ ގޮތަށް "ރިކޯލް ވޯޓު" ނެގުމާ ބެހޭ ގާނޫނެއް ގެންނަން ތާއީދު ހޯދުމުގެ މަސައްކަތް މީގެ ކުރިން ބަޔަކު ކޮށްފައި ވެެެއެވެ.
އެގޮތުން މެމްބަރަކު ނިސްބަތްވާ ދާއިރާއެއްގައި ވޯޓުލެވޭ މީހުންގެ ތެރެއިން ތިން ބައިކުޅަ ދެ ބައި މީހުން ސޮއިކޮށް، އިލެކްޝަންސް ކޮޮމިޝަނަށް ޕެޓިޝަނެއް ހުށަހަޅައިފި ނަމަ، އެ މެމްބަރަކު ވަކިކުރަން ފެނޭތޯ ބަލަން 45 ދުވަސް ތެރޭގައި އިންތިހާބެއް ބާއްވަން ޖެހުމާއި، ވޯޓު ދިން މީހުންގެ އަގުލަބިއްޔަތު އެ މެމްބަރަކު ވަކިކުރަން ލިބިއްޖެ ނަމަ، އެ ހިސާބުން އެ މީހަކު މަގާމުން ވަކިވާގޮތަށް ޕެޓިޝަނެއް ތައްޔާރުކޮށް ވޯޓު ހޯދުމުގެ މަސައްކަތް ކުރިއެވެ. އެކަން ކާމިޔާބެއް ނުވި އެވެ.
އޭގެފަހުން މަޖިލީހުގެ މެމްބަރުން ވަކިވަރެއްގައި ހިފަހައްޓައި މިހާރު ހުރިވަރުން އިތުރުވިޔަ ނުދިނުމަށް ހުށަހެޅުއްވި އިސްލާހުވެސް މިފަހުން މަޖިލީހުން ވަނީ ބޭރުކޮށްލާފަ އެވެ.
