މަނަދޫ ކައުންސިލުގެ ރައީސް އަބްދުއްރަހްމާން ސަބީހު "ސީއެންއެމްއަށް" އަށް މައުލޫމާތު ދެއްވަމުން ވިދާޅުވީ ސިނާއީ މަސައްކަތްތަކަށް ބިން ދޫކުރަން ބޭނުންވި ނަމަވެސް އެކަމަށް އެޅިފައި އޮތް ހުރަހަކީ ލޭންޑް ޔޫސް ޕްލޭން ފާސްނުވެ އޮތުން ކަމަށާއި މި ހަފްތާގެ ތެރޭގައި ލޭންޑް ޔޫސް ޕްލޭންގެ އެޕްރޫވަލް ލިބޭނެކަމަށް އުންމީދު ކުރައްވާ ކަމަށެވެ.
ރައީސް ވިދާޅުވީ ގާތްގަނޑަކަށް 3،000 މީހުން އާބާދީއެއް އޮތް މަނަދޫގައި ހެވީ މެޝިނަރީސް ބޭނުންކޮށްގެން މަސައްކަތް ކުރާ ތަންތަން ސިނާއީ ސަރަހައްދަށް ބަދަލުކުރުމުގެ ވިސްނުން ގެންގުޅެމުން އަންނަ ކަމަށާއި އެފަދަ ތަންތަން މިހާރު ގިނައިން ހިންގަނީ އަމިއްލަ މީހުންގެ ގޭގޭގައި ކަމުން ކައިރީގައި ދިރިއުޅޭ މީހުންނަށް އެކަމުގެ ސަަބަބުން އުދަނގޫތަކާ ކުރިމަތިލާން ޖެހޭކަމުގެ ޝަކުވާ ލިބެމުން އަންނަ ކަމަށެވެ.
މަނަދޫ: އިގުތިސާދީ ހަރަކާތްތަކަށް ފައްކާ ކުރަނީ--- ފޮޓޯ: އަލީ ސާލިމް
ކައުންސިލުގެ ރައީސް އިތުރަށް ވިދާޅުވީ ސިނާއީ މަސައްކަތްތަކަށް ބިން ދޫކުރާއިރު ރަށުން ބޭރު މީހުންނަށް ވެސް ސިނާއީ ބިން ހޯދުމަށް ކުރިމަތިލެވޭނެ ކަމަށާއި ބިން ދޫކުރާއިރު ފުރަތަމަ ދޫކުރުމަށް ވިސްނާފައި ހުރީ 5000 އަކަފޫޓުގެ ސްލޮޓްކަމަށެވެ.
އޭނާ އިތުރަށް ވިދާޅުވީ ސިނާއީ ސަރަހައްދު ހާއްސަ ވެގެންދާނީ އެފަދަ ބޮޑެތި މަސައްކަތްތައް ކުރާ ސަރަހައްދެއްގެ ގޮތުގައި ކަމަށާއި އެކަން އެ ގޮތަށް ހަމަޖެހުމުން އިތުރު ފަސޭހަތަކެއް ލިބިގެންދާނެކަމަށް އޭނާ ވިދާޅުވި އެވެ.
