ރާއްޖެ ބަނގުރޫޓުވަމުންދާ ކަމަށް ބުނެ ދެކެވޭ ވާހަކަތަކަށް ރައްދުދެއްވައި ރައީސް އޮފީހުގައި އިއްޔެ އޮތް ނޫސްވެރިންގެ ބައްދަލުވުމުގައި އެ އޮފީހުގެ ތަރުޖަމާން މިއުވާން މުހައްމަދު ވިދާޅުވީ، އިގުތިސޯދު މިއަހަރު ގާތްގަނޑަކަށް 12.3 އިންސައްތަ ކުރިއަރާނެ ކަމަށާއި، އަންނަ އަހަރު 7.6 އިންސައްތަ ކުރިއަރާނެ ކަމަށެވެ.
އެކަން ބައިނަލްއަގުވާމީ މާލީ އިދާރާތަކުންވެސް ފާހަގަކުރަމުން ގެންދާކަމަށް މިއުވާން ވިދާޅުވި އެވެ. އަދި އިގްތިސޯދީ ގޮތުން އަންނަ ގޮންޖެހުންތަކުގެ ސަބަބުން ރައްޔިތުންގެ ޖީބަށް އޭގެ އަސަރެއް ނުކުރާނެކަމުގެ ޔަގީންކަން ދިނުމަށްޓަކައި ސަރުކާރުން އަޅަންޖެހޭ ފިޔަވަޅެއް އަޅަމުންދާނެ ކަމަށް ވެސް މިއުވާން ވިދާޅުވި އެވެ.
ޓެކްސް ނެގުމުގައި ގެނައި ބަދަލުތަކަކީވެސް އެމަގުން ސަރުކާރުން ގެނައި ބަދަލެއްކަން ފާހަގަކުރައްވާ މިއުވާން ވިދާޅުވީ، އެހެން ގައުމުތަކަށް މެދުވެރިވިފަދަ ދަތި ހާލަތެއް މެދުވެރިވިޔަ ނުދިނުމަށްޓަކައި ދެންވެސް އަޅަންޖެހޭ ފިޔަވަޅުތައް ސަރުކާރުން އަޅަމުންދާނެ ކަމަށެވެ.
