ދުނިޔޭގެ ބާޒާރުގައި ތެލުގެ އަގު އުފުލިފައި މިވަނީ، ރަޝިއާއިން ޔޫކްރެއިން އަށް ދެމުން އަންނަ ހަމަލާ ތަކާއި ގުޅިގެން ރަޝިއާ އާއި ދެކޮޅަށް ޖީ-7ގެ ގައުމުތަކުން އަޅަން ނިންމި ދަތިކުރުމުގެ ފިޔަވަޅުތަކުގެ ސަބަބުންނެވެ.
އެގޮތުން ޖީ-7ގެ ގައުމުތަކުން ވަނީ، ރަޝިއާއިން އުފައްދާ ތެޔޮ ގަންނަ އެންމެ ބޮޑު އަގެއްގެ ގޮތުގައި، 60 ޑޮލަރު ކަނޑައަޅާފަ އެވެ.
މި ބަދަލު ގެނައުމާއި ގުޅިގެން ބާޒާރުގައި ތެޔޮ ފީފާއެއް މިހާރު ލިބެން ހުރީ، 87 އެމެރިކާ ޑޮލަރަށެވެ. އަދި ބައެއް ހިސާބުތަކުގައި ފީފާއެއްގެ އަގު ވަނީ 98 ޑޮލަރަށްވެސް އުފުލިފަ އެވެ.
ޖީ-7ގެ ގައުމުތަކުން މި ގޮތަށް ނިންމި ނަމަވެސް ރަޝިއާއިން ވަނީ، މިކަމުގެ ސަބަބުން އެގައުމުން ތެޔޮ އުފައްދާ މިންވަރަށް އެއްވެސް ބަދަލެއް ނުގެންނާނެ ކަމަށް ބުނެފަ އެވެ. އަދި އެ ބަދަލާއި އެކުވެސް ރަޝިއާގެ ތެލަށް އޮތް ޑިމާންޑު ކުޑަނުވާނެ ކަމަށާއި، މިކަމުގެ ގެއްލުން ކުރާނީ ރަޝިއާ އަށްވުރެ ބޮޑަށް އެހެން ގައުމު ތަކަށް ކަމަށްވެސް ރަޝިއާ އިން ވަނީ ބުނެފަ އެވެ.
މީގެ އިތުރުން ރަޝިއާއިން ބުނީ، ތެޔޮ ގަންނާނެ އެންމެ ބޮޑު އަގު ކަނޑައެޅި ނަމަވެސް އެ ނިންމުން ބަލައި ނުގަންނާނެ ކަމަށާއި، އެގައުމުން އުފައްދާ ތެޔޮ ވިއްކާނެ އަގެއް އެނގޭނީ އެގައުމަށް ކަމަށެވެ.
