ކޮންމެ އަހަރެއްގެ ވެސް ފަހުކޮޅު އަދި އާ އަހަރާއި ދިމާކޮށް ރާއްޖެއަށް ގިނަ އަދަދެއްގެ ފަތުރުވެރިން އާދެ އެވެ. އެގޮތުން މިއަހަރު ވެސް ރާއްޖެއަަށް ގިނަ އަދަދެއްގެ ފަތުރުވެރިން ދަނީ އަންނަމުންނެވެ. އެހެން ނަމަވެސް މިދުވަސްވަރު ވޯލްޑް ކަޕް ކުރިއަށް ދާތީ ގިނަ އަދަދެއްގެ ބަޔަކު ވަނީ ގަތަރަށް ދަތުރުކޮށްފަ އެވެ. އަދި ވޯލްޑް ކަޕް ބެލުމަށް ވެސް ގިނަ ބަޔަކު ވަގުތު ދޭތީ ދުނިޔޭގެ އެކި ސަރަހައްދުތަކަށް ޗުއްޓީއަށް ދަތުރު ކުރާ މީހުންގެ އަދަދުތައް ވަނީ ދަށްވެފަ އެވެ.
ރާއްޖޭގެ ފަތުރުވެރި ކަމުގައި އެންމެ ފުންނާބު އުސް ރިސޯޓުތަކުން އާންމުކޮށްފައިވާ މައުލޫމާތުތަކަށް ރިޔާއަތް ކުރައްވާ ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ، ރާއްޖޭގެ އެންމެ ހައި ސްޓޭންޑާޑް ރިސޯޓުތައް މިހާރު ވެސް ފުރިފައިވާކަމަށެވެ.
ސަރުކާރުން މިއަހަރަށް އަމާޒުހިފާފައިވަނީ 1.6 މިލިއަން ފަތުރުވެރިން ރާއްޖެ ގެނައުމަށެވެ. ޓޫރިޒަމް މިނިސްޓްރީގެ އެންމެ ފަހުގެ ހިސާބުތައް ދައްކާގޮތުން މިއަހަރުގެ މިހާތަނަށް ރާއްޖެއަށްވަނީ 1.5 މިލިއަން ފަތުރުވެރިން ޒިޔާރަތްކޮށްފަ އެވެ. މިނިސްޓަރު މައިސޫމް ފާހަގަ ކުރެއްވިގޮތުގައި މިއަހަރަށް ކަނޑައަޅާފައިވާ އަމާޒަށް އަންނަ ހަފްތާތެރޭ ވާސިލުވާނެ އެވެ.
ފަތުރުވެރިކަމުގެ ސިނާއަތުގައި ހަރަކާތްތެރިވާ ޓުއާ އޮޕަރޭޓަރުން ހާމަކުރާ ގޮތުގައި ވޯލްޑުކަޕް ނިމޭ އިރަށް ރާއްޖެއަށް ގިނަ އަދަދަކަށް ފަތުރުވެރިން އައުމަށް މިހާރު ވެސް ބުކިންތައް ވަނީ ހަދާފަ އެވެ. އަދި މިހާރު ވެސް ރާއްޖެއަށް ދުވަހުން ދުވަހަށް އަންނަ ފަތުރުވެރިންގެ އަދަދުތައް މަތިވަމުން އަންނަ ކަމަށާއި، ވަރަށް މަދު ރިސޯޓެއްގައި ނޫނީ މިހާރު އޮކިޔުޕެންސީ ރޭޓު މިވަގުތު ހުރީ 70 އިންސައްތަ އާއި 80 އިންސައްތަ އާ ދެމެދުގައި ކަމަށްވެސް އެ ފަރާތް ތަކުން ބުނެ އެވެ.
ރާއްޖެއަށް ފަތުރުވެރިން ގެނައުމުގައި ހަރަކާތްތެރިވާ ކެޕިޓަލް ޓްރެވަލްގެ ސީއީއޯ ޔޫސުފް ރިފްއަތު ވިދާޅުވީ، ރާއްޖެއަށް ފަތުރުވެރިން އަންނަ އަދަދުތަކާއި ރާއްޖެއަށް ފަތުރުވެރިން އައުމަށް ބުކިން ހަދާފައިވާ އަދަދުތަކަށް ބަލާއިރު، މިއަހަރު ނިމޭއިރު ރާއްޖެއަށް 1.7 މިލިއަން ފަތުރުވެރިން އަންނާނެކަމަށް ލަފާކުރެވޭ ކަމަށެވެ.
އޭނާ ވިދާޅުވީ، އަންނަ މަހުގެ މެދެއްހާ ހިސާބުން ޗައިނާ ވެސް ހުޅުވިގެންދާނެ ކަމަށް ލަފާކުރެވޭ ކަމަށާއި އެއާ އެކު ރާއްޖެއަށް އަންނަ ފަތުރުވެރިންގެ އަދަދުތައް މައްޗަށް ޖެހިގެންދާނެ ކަމަށް ގަބޫލުކުރާ ކަމަށެވެ. ޓްރެވަލް އެޖެންސީތަކުން ވެސް އަންދާޒާ ކުރަމުންދަނީ ރާއްޖެއަށް އަންނަ ފަރުވެރިން އިތުރުވަމުންދާނެ ކަމަށެވެ.
