މަސްވެރިންގެ ދުވަހުގެ މުނާސަބަތުގައި ގދ. ފަރެސްމާތޮޑާގައި އިއްޔެ ބޭއްވި ހާއްސަ ޖަލްސާގައި ވާހަކަ ދައްކަވަމުން ޑރ. ހުސެއިން ވިދާޅުވީ ރާއްޖޭގައި ބާނާ މަހަށް ބޮޑު ރަނގަޅު އެކަށޭނަ އާމްދަނީއެއް ހޯދިމަށް ދިމާވާ އެނމެ ބޮޑި ހުރަހަކީ ހުޅަގުގެ ގައުމުތަކަށާއި އިނގިރޭސި ވިލާތަށް މަސް އެކްސްޕޯޓު ކުރާއިރު ނަގާ ޑިއުޓީ ބޮޑުވުން ކަމަށެވެ ނަމަވެސް ސަރުކާރުން މިހާރު ކޮށްފައިވާ މަސއްކަތްތަކުގެ ސަބަބުން ވަރަށް އަވަހަށް އިނގިރޭސި ވިލާތުން ޑިއުޓީ އިނާޔަތް ލިބިގެން ދާނެ ކަމަށެވެ.
މަސްވެރިންނަށް ވަރަށް ބޮޑެތި ގޮންޖެހުންތަކެއް ކުރިމަތިވެފައިވާކަން ފާހަގަކުރައްވާ މިނިސްޓަރ ވިދާޅުވީ ސަރުކާރުން ނަސްވެރިކަމުގެ ސިނާއަތް ކުރިއެރުވުމަށްޓަކައި ނުހަނު ގިނަ ގުނަ މަސައްކަތް ތަކެއް ކުރަމުން އަންނަ ކަމަށާ ނަމަވެސް މައްސަލަތަކަށް ދާއިމީ ހައްލެއް ލިބެން އަދި ދުވަސްކޮޅެއް ނަގާނެ ކަމަށެވެ.
އޭގެރ އިތުރަށް އޭނާ ވިދާޅުވީ ރާއްޖޭގައި މަސް ގަންނަ ކެޕޭސިޓީ ނެތް މިންވަރަށް މަސްވެރިކަން ފަހި މޫސުމުގައި މަސް ބާނަމުންދާ ކަމަށާއި އިންޑިއާ ކަނޑުގައި މިހާރު މަސް މަދުވަމުންދާ ކަމަށް ހުސެއިން ވިދާޅުވި އެވެ. އަދި މިހާރަށް ވުރެ ރަނގަޅު ނިޒާމެއްގެ ތެރެއިން މަސް ބާނަން ޖެހޭ ކަމަށް ވިދާޅުވި އެވެ.
މަސްވެރިންނަށް ދިމާވާ ގޮންޖެހުންތައް ހައްލު ކުރުމަށް ކުރަންޖެހޭ އެންމެ މުހިއްމު އެއް ކަމަކީ ކޫއްޑޫގެ ކެޕޭސިޓީ ބޮޑު ކުރުންކަން ހުސެއިން ފާހަގަ ކުރެއްވި އެވެ. ކޫއްޑޫގައި މިހާރު ހުރި 2000 ޓަނުގެ ކޯލްޑް ސްޓޯރޭޖްއަށް އިތުރު 4000 ޓަނުގެ ސްޓޯރޭޖް އިތުރު ކުރުމުގެ މަސައްކަތް މިހާރު ކުރެވެމުންދާ ކަމަށްވެސް ހުސެއިން ވިދާޅުވި އެވެ.
ކޫއްޑޫއަށް ވަރަށް ފަހަކާ ޖެހެންދެން ކިރުވެމުންއައީ ދުވާލަކު 240 ޓަނުގެ ރޯމަސް ކަމަށާއި ފްރީޒިން ސިސްޓަމަށް ގެނެވުނު ބަދަލަކާއި ގުޅިގެން އިތުރު 50 ޓަނުގެ މަސް މިހާރު ދުވާލަކު 290 ޓަނުގެ މަސް ކޫއްޑޫއަށް ކިރޭނެ ކަމަށް ހުސެއިން ވިދާޅުވި އެވެ.
މީގެ އިތުރުން އަންނަ އަހަރުގެ ޖުލައި މަހުގެ ނިޔަލަށް އިތުރު 240 ޓަނުގެ ކެޕޭސިޓީ ކޫއްޑޫގައި ގާއިމް ކުރެވޭނެ ކަމަށާއި އޭރުން ކޫއްޑޫގެ ބްރައިން ކެޕޭސިޓީ ދުވާލަކު 530 ޓަނަށް އަރާނެ ކަމަށް ހުސެއިން ވިދާޅުވި އެވެ.
