އެމްއެމްޕީއާރްސީގެ ހިޔާނާތުގެ ތަހުގީގަށް މިއަދު ހާޒިރުވެ އިންނެވި ފޮޓޯއަކާއިއެކު ކުރެއްވި ޓުވީޓެއްގައި ދުންޔާ ވިދާޅުވީ، ”އޭސީސީއަށް ދަމައިފި“ ކަމަށާއި، އިރާދަކުރެއްވިއްޔާ ހަގީގަތާއި އިންސާފަށް އަބަދުވެސް ވަކާލާތުކުރައްވާނެ ކަމަށެވެ.
ދުންޔާ އިތުރަށް ވިދާޅުވީ އެ ތުހުމަތުތަކަކީ ސިޔާސީ ކަމެއް ކަމަށާއި، ދޮގާއި، ފުރުއްސާރަ ކަމަށެވެ.
އޭސީސީއަށް ހާޒިރު ވުމަށް ދުންޔާއަށް އަންގާފައި އޮތީ މިއަދު ހެނދުނު 11:00 އަށެވެ. މިއީ އޭސީސީއަށް މިމައްސަލާގައި ދުންޔާ ހާޒިރުކުރާ ދެވަނަ ފަހަރެވެ.
ރާއްޖޭގައި މިހާތަނަށް ހިންގާފައިވާ އެންމެ ބޮޑު ހިޔާނާތް ކަމަށްވާ، އެމްއެމްޕީއާރްސީގެ ކޮރަޕްޝަންގެ މައްސަލައިގައި އޭސީސީން ހިންގަމުންދާ ތަހުގީގަށް ކުރީގެ މަޖިލިސް މެމްބަރު ރިޔާޒް ރަޝީދުގެ އާއިލީ މަސްލަހަތު އޮންނަ ކުންފުންޏެއް ކަމަށްވާ ޕޮޕިއުލާ މޯލްޑިވްސް ވެސް ވަނީ މިދިޔަ އޮކްޓޫބަރު ތެރޭގައި ހާޒިރުކޮށްފަ އެވެ.
އެމްއެމްޕީއާރުސީގެ ހިޔާނާތުގެ މައްސަލައިގައި މިހާތަނަށް ދައުވާ އުފުލާފައިވަނީ، ކުރީގެ ރައީސް އަބްދުﷲ ޔާމީން ކުރީގެ ނާއިބު ރައީސް އަހްމަދު އަދީބު އަދި އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔަތާއި ރައްޔިތުންގެ މަޖިލީހުގެ ކުރީގެ މެމްބަރު އަހުމަދު ނިހާން ހުސެއިން މަނިކުގެ މައްޗަށެވެ.
އިތުރު ފަރާތްތަކެއްގެ މައްޗަށް ދައުވާކޮށްދޭން އެދި ޕީޖީ އޮފީހަށް ފޮނުވުމުގެ މަރުހަލާތައް މިހާރު ހިނގަމުންދާއިރު، އެއީ އިތުރު ފަސް މައްސަލައެއް ކަމަށްވަނީ މައުލޫމާތު ލިބިފަ އެވެ.
