މި ކޭމްޕު އިފްތިތާހް ކުރުމުގެ ގޮތުން ގިރިފުށީ ޓްރޭނިންގ ސެންޓަރުގައި މިއަދު ހެނދުނު ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ޑިފެންސް އިންޓެލިޖެންސް ސަރވިސްގެ ޕްރިންސިޕަލް ޑައިރެކްޓަރު ކާނަލް އިބްރާހީމް ނަޢީމެވެ.
ރަސްމިއްޔާތުގައި ކާނަލް އިބްރާހީމް ނަޢީމް ދެއްކެވި ވާހަކަފުޅުގައި ކެޑޭޓް ކޭމްޕުގެ މުހިންމުކަމާއި އަދި ކޮންމެ ދަރިވަރަކު ވެސް ހިތްވަރާއެކު މަސައްކަތްކޮށް، ކޭމްޕުން ދަސްކުރި އެއްޗެހީގެ ބޭނުން އަމަލީ މައިދާނުގައި ހިފުމަށް ކޭމްޕުގެ އެންމެހާ ދަރިވަރުންނަށް ނަސޭހަތްތެރި ވެލެއްވިއެވެ.
މި ކޭމްޕުގެ މުދައްރިބުންނަށް ވައުދު ލައިދެއްވުމާއި، ކޭމްޕުގެ ދަރިވަރުންނަށް އިގުރާރު ލައިދެއްވުން ވެސް އޮތެވެ. މުދައްރިބުންނަށް ވައުދު ލައިދެއްވީ ކެޑޭޓް ކޭމްޕުގެ ޗީފް އިންސްޓްރަކްޓަރު ކެޕްޓަން މުޙައްމަދު ނަޞީރެވެ. އަދި ދަރިވަރުންނަށް އިގުރާރު ލައިދެއްވީ ކޭމްޕުގެ ސީނިއަރ އެންލިސްޓެޑް ލީޑަރ ސާޖަންޓް މޭޖަރ ޢަބްދުލް ޢަޒީޒު އިބްރާހިމްއެވެ.
މިއަދުން ފެށިގެން އަންނަ މަހުގެ ހަތަރު ވަނަ ދުވަހުގެ ނިޔަލަށް ކުރިއަށްގެންދާ މި ކޭޕްގައި ރާއްޖޭގެ އެކިކަންކޮޅުތަކުން 33 ސްކޫލަކުން، 60 ފިރިހެން ކުދިންނާއި އަދި 59 އަންހެން ކުދިންނާއެކު ޖުމްލަ 119 ދަރިވަރުން ބައިވެރިވިއެވެ.
މި ކެޑޭޓް ކޭމްޕުގެ މަގުސަދަކީ މި ކޭމްޕްގައި ބައިވެރިވާ ކޮންމެ ކެޑޭޓަކީ ވެސް މުޖްތަމައަށް ފާއިދާހުރި އަދި ދިމާވާ އެކިއެކި ހާދިސާތަކުގައި ރޭވުންތެރިކަމާއެކު އެހީތެރިކަން ފޯރުކޮށްދިނުމުގެ ގާބިލްކަން ހުރި ޒިންމާދާރު ރައްޔިތަކަށް ހެދުމާއި ރާއްޖޭގެ އެކި ކަންކޮޅުތަކުން މިކޭމްޕުގައި ބައިވެރިވާ ދަރިވަރުންގެ މެދުގައި އެކުވެރިމާއި އެއްބައިވަންތަކަމުގެ ރޫހް އާލާކުރުމެވެ.
މީގެ އިތުރުން ކޭމްޕުގައި ބައިވެރިވާ ކެޑޭޓުންނަކީ ހަރުދަނާ އަހުލާގާއި ރިވެތި ސުލޫކެއްގެ ވެރި ބައެއްގެ ގޮތުގައި ބިނާކުރުމާއި، ކެޑޭޓުންގެ މެދުގައި ދީނީ އަދި ގައުމީ ރޫހު އާލާކޮށް ދިރުވުމާއި، ގާނޫނާއި ގަވާއިދަށް ހުރުމަތްތެރިކޮށް ހިތުމުގެ މުހިންމުކަން އަންގައިދިނުމުގެ އިތުރުން މައިންބަފައިންނާއި މުދައްރިސުންގެ ބަސް ގަބޫލުކުރާ ކިޔަމަންތެރި ކުދިބަޔަކު އުފެއްދުން ވެސް މި ކޭމްޕުގެ މަގްސަދުތަކުގެ ތެރޭގައި ހިމެނެއެވެ. އަދި ދިވެހި އަސްކަރިއްޔާގެ އުނގެނުމުގެ ވެއްޓެއްގައި ނަފްސު ތަރުބިއްޔަތުކޮށް ބައްޓަން ކުރުމުގެ ފުރުސަތު ގައުމީ ކެޑޭޓުންނަށް ފަހިކޮށްދިނުމާއި، އަސްކަރީ ހުނަރުތަކުގެ ތެރެއިން ކަނޑައެޅޭ ބައެއް އަސާސީ ހުނަރުތައް ކެޑޭޓޫންނަށް ތަޢާރަފް ކޮށްދިނުން ވެސް މި ކޭމްޕްގެ މަގުސަދުތަކުގެ ތެރޭގައި ހިމެނެއެވެ.
ކޭމްޕު ނިމުމުން އެކިއެކު ވަނަތަކަށް ހޮވޭ ކެޑޭޓުންނަށް އިނާމު ދިނުމަށް ވަނީ ހަމަޖެހިފައެވެ. އެގޮތުން އެންމެ މޮޅު ފިރިހެން ދަރިވަރު ހޮވުމާއި، އެންމެ މޮޅު އަންހެން ދަރިވަރު ހޮވުމަށް ވަނީ ހަމަޖެހިފައެވެ. މީގެ އިތުރުން އުނގަންނައި ދެވުނު އެކެޑެމިކް މާއްދާތަކުން އެންމެ މޮޅު ދަރިވަރު ހޮވުމާއި، އެންމެ މޮޅު ޕްލެޓޫން ފަދަ ވަނަތައް ވެސް ހޮވުމަށް ވަނީ ހަމަޖެހިފައެވެ.
މި ކެޑޭޓް ކޭމްޕުގައި ކިޔަވައިދޭ މާއްދާތަކުގެ ތެރޭގައި ޑްރިލް، ފިޒިކަލް ޓްރޭނިންގ، ވޯޓަރމަންޝިޕް، ފަސްޓްއެއިޑް، ވެޕަން ހޭންޑްލިންގ، ބޭސިކް ފީލްޑް ކްރާފްޓް، ލީޑަޝިޕް އަދި މެރިޓައިމް ސްޓަޑީޒް ހިމެނެއެވެ. މި ކޭމްޕުގައި ކިޔަވާދެއްވަނީ މޯލްޑިވްސް ނޭޝަނަލް ޑިފެންްސް ފޯސްގެ މުދައްރިބުންނާއި މޯލްޑިވްސް ނޭޝަލް ކެޑޭޓް ކޯގެ މުދައްރިބުންނެވެ.
ދިވެހިރާއްޖޭގެ ގައުމީ ކެޑޭޓް ކޭމްޕުގެ އެންމެހާ އެޑްމިނިސްޓްރޭޓިވް އަދި ލޮޖިސްޓިކް ކަންކަން ހަމަޖައްސަނީ އެމްއެންޑީއެފްގެ ފަރާތުންނެވެ. މީގެ އިތުރުން ސްކޫލްތަކާއި ގުޅިގެން ހަމަޖައްސަންޖެހޭ ކަންކަން މިނިސްޓްރީ އޮފް އެޑިޔުކޭޝަންގެ ލަފަޔާއި އިރުޝާދުގެ މަތިން ހަމަޖައްސާ ފަރާތަކީ މޯލްޑިވްސް ނެޝަނަލް ކެޑޭޓް ކޯއެވެ. މީގެ އިތުރުން ކޭމްޕުގެ މުއްދަތުގައި އެމްއެންސީސީ ގެ ފަރާތުން އެކަމަށް ކަނޑައެޅޭ މުދައްރިބުން ގިރިފުށީގައި ހަރަކާތްތެރިވާނެއެވެ.
މި ކޭމެޕް އިފްތިތާހް ކުރުމުގެ ރަސްމިއްޔާތުގައި ޝަރަފުވެރި މެހެމާނުގެ އިތުރުން މިކޭމްޕުގެ ކޮމާންޑަރު ކެޕްޓަން ޢަބްދު ﷲ ނައުޝާދާއި، ޗީފް އިންސްޓްރަކްޓަރު ކެޕްޓަން މުޙައްމަދު ނާޞިރު އަޙްމަދާއި، އެގްޒެކެޓިވް އޮފިސަރު ކޮމާންޑް ސާޖަންޓް މޭޖަރ އާޒާދު ރުޝްދީއާއި، ކޭމްޕްގެ ސީނިއަރ އެންލިސްޓެޑް ލީޑަރ ސާޖަންޓް މޭޖަރ ޢަބްދުލް ޢަޒީޒް އިބްރާހީމްގެ އިތުރުން ކެޑޭޓް އިންސްޓްރަކްޓަރުންނާއި މިނިސްޓްރީ އޮފް ޑިފެންސްގެ ސްޓާފުންނާއި ކޭމްޕުގެ އެންމެހާ ދަރިވަރުން ބައިވެރިވެލެއްވިއެވެ.
