މިއީ މީގެ ދެ އަހަރު ކުރިން މަރުވި ސުޝާންތުގެ މަރާއި ގުޅޭގޮތުން ހޮސްޕިޓަލުގެ މުވައްޒަފަކު ވާހަކަ ދެއްކި ފުރަތަމަ ފަހަރެވެ.
އޭންއޭއައި ނިއުސް އަށް ދިން އިންޓަވިއުއެއްގައި، ކޫޕާ ހޮސްޕިޓަލްގެ މޯޗަރީގައި މަސައްކަތް ކުރާ ރޫޕްކުމާރް ޝާހް ބުނީ ޝުޝާންތުގެ ގައިގައި އަނިޔާގެ ނިޝާންތައް ހުރި ކަމަށެވެ. އަދި އޭނާ ދަންޖެހުނު ކަމުގެ ނިޝާނެއް ހަށިގަނޑުގައި ފެންނަން ނެތް ކަމަށެވެ.
އޭނާ ބުނީ އަނިޔާގެ ނިޝާންތައް ފެނުމުން އޭނާގެ އިސްވެރިންނަށް އެ މައުލޫމާތު އެންގިކަމަށެވެ. ނަމަވެސް އެކަމާ ފަހުން ޖަވާބު ދޭނަކަމަށް ބުނެ ފަހުން އަޅާނުލާ ކަމަށް ވެސް އޭނާ ބުންޏެވެ.
ޕޯސްޓު މޯޓަން ރިޕޯޓުގައި ބުނެފައިވަނީ ސުޝާންތު މަރުވީ އަމިއްލައަށް ކަމަށެވެ.
ދެހާސް ވިހި ވަނަ އަހަރުގެ ޖޫން މަހުގެ 14 ވަނަ ދުވަހު މުޅި ބޮލީވުޑް ސިއްސުވާލީ މަޝްހޫރު އެކްޓަރު ސުޝާންތު ސިން ރާޖްޕޫތު މުމްބާއީގައި އޭނާ ދިރިއުޅޭ އެޕާޓު މަންޓުގައި ދަންޖެހިފަ ހުއްޓާ ފެނުނު ހަބަރާއެކުއެވެ.
އެޕާޓުމެންޓުގައި ސުޝާންތު ދަންޖެހިފަ ހުއްޓާ ފެނުމުން ފުލުހުން އެންމެ ފުރަތަމަ ބުނީ މިއީ ސުސައިޑް (އަމިއްލައަށް މަރުވުމުގެ) ކޭހެއް ކަމަށެވެ. އެހެން ނަމަވެސް ސުޝާންތުގެ އާއިލާގެ އިތުރުން ގިނަ އަދަދެއްގެ އާންމުން ބުނަނީ މި މައްސަލަ އަކީ ބަޔަކު ރާވައިގެން ހިންގާފައިވާ ޖަރީމާއެއް ކަމަށެވެ.
އާއްމުންނާއި އާއިލާއިން ދަނީ މިކަމާއި ގުޅިގެން ތުހުމަތުގެ އިނގިލި އެކި ފަރާތްތަކަށް ދިއްކުރަމުންނެވެ. މި މައްސަލާގައި ތުހުމަތުގެ އިނގިލި އެންމެ ބޮޑަށް ދިއްކޮށްފައިވަނީ ސުޝާންތުގެ ލޯބިވެރިޔާ ރިއާ ޗަކަރްބަތީއަށެވެ. ނަމަވެސް އޭނާ އެ ތުހުމަތުތައް ދޮގު ކުރެ އެވެ.
ޝުޝާންތުގެ މަރުގެ ވާހަކަ އަނެއްކާވެސް ފެންމަތިވެފައިމިވަނީ، ބޮލީވުޑްގެ ތަރި އެކްޓުކުރާ ތޫނީޝާ ޝަރުމާ، 20 ދަންޖެހި މަރުވެފައި ހުއްޓައި ފެނުމާ ގުޅިގެންނެެވެ.
ތޫނީޝާ ވެސް އަމިއްލަ އަށް މަރުވީތޯ ނުވަތަ މަރާލީތޯ ތަހުގީގު ކުރުމުގެ މަސައްކަތް އިންޑިއާ ފުލުހުން ގެންދަނީ ކުރަމުންނެވެ. މި މައްސަލައިގައި ވެސް ތޫނީޝާގެ ލޯބިވެރިޔާ ޝީޒަން ހާން ވަނީ ހައްޔަރުކޮށްފައެވެ.
