މަރީގެ ހާލު ދެރަވެ ފަރުވާ ހޯދަން ފެށީ، މިދިޔަ އަހަރުގެ މޭ މަހުގެ 28 ވަނަ ދުވަހު ހޮސްޕިޓަލުގެ ކެންޓީނުން ގަތް ކްރީމް ޖެހި ބަނަހެއް ކެއުމުގެ ސަބަބުން އެލާޖިކް ވެގެން އައިޖީއެމްއެޗް އަށް ގެންދިއުމުން އެ ހޮސްޕިޓަލުން ޖެހި އިންޖެކްޝަނެއްގެ ސަބަބުންނެވެ.
މަރީގެ ކަށުނަމާދު މިއަދުގެ އަސުރު ނަމާދަށް ފަހު އާސަހަރާގައި ބޭއްވުމަށް ވަނީ ހަމަޖެހިފައި ވާކަމަށް އާއިލާއިން ވަނީ ބުނެފަ އެވެ. އަދި ވީހާވެސް ގިނަ ބަޔަކު މަރީގެ ކަށުނަމާދުގައި ބައިވެރިވުމަށް އާއިލާއިން ވަނީ އެދިފަ އެވެ.
މަރީ ހާލަތާއި ގުޅިގެން އައިޖީއެމްއެޗް އިން މީގެ ކުރިން މަރީގެ އާއިލަށް ފޮނުވި ސިޓީއެއްގައި، ނުބައިކޮށް އިންޖެކްޝަން ދެވުނުކަން ގަބޫލުކޮށް، އެ މައްސަލަ ބަލާ ފިޔަވަޅު އަޅާނެ ކަމަށް ބުނެފަ އެވެ. އަދި އެކަމަށް އެ ހޮސްޕިޓަލުން ވަނީ މާފަށްވެސް އެދިފަ އެވެ.
މަރީ ނިޔާވެފައި ވަނީ، މިމަހުގެ 25 ވަނަ ދުވަހުގެ ހެނދުނުގެ ވަގުތެއްގަ އެވެ.
މަރީ ނިޔާވުމާއި ހަމައަށްވެސް މަރީ އޮތީ ހޭނާރާ އެވެ. އައިޖީއެމްއެޗް އިން އޭނާ ބެލުމަށްފަހު ދެވޭނެ އިތުރު ފަރުވާއެއް ނެތުމުން އާއިލާއިން ވަނީ މަރީ އިންޑިއާ އަށްވެސް ގެންގޮސްފަ އެވެ. އެހެން ނަމަވެސް އިންޑިއާއިންވެސް މަރީ ބެލުމަށްފަހު ދެވޭނެ އިތުރު ފަރުވާއެއް ނެތުމުން، މި އަހަރުގެ މޭ މަހު އޭނާގެ އާއިލާއިން ވަނީ މަރީ ރާއްޖެއަށް ގެނެސްފަ އެވެ.
