ހުތުބާގައި ބުނީ، ލިބިފައިިވާ މިންވަރަށް ރުުހި މާތްﷲ އަށް ޝުކުރު ކުރުންމަތީ ދެމިތިބޭ މީހުންނަށް ތައުރީފުގެ ބަސް މާތްﷲ ރައްދުކުރައްވާފައިވާ ކަމަށާއި، އެފަދަ މީހުންނަށް މާތްﷲ ކަނޑައަޅުއްވާފައިވާ މުއްދަތެއްގައި ތަނވަސްކަމާއި ތިޔާގިކަން ދެއްވާނެ ކަމަށެވެ.
ހުތުބާގައި ބުނީ، ތިމާގެ އަތުގައި ހުރި އެއްޗެހި ހޭދަކުރަންވީގޮތްވެސް މާތްﷲ އަންގަވާފައިވާ ކަމަށެވެ. އެގޮތުން މުދަލުން ހޭދަކުރުމުގައި އިސްރާފު ނުކުރުމާއި، ހޭދަކުރުމުގައި މުއްބާރު ނުކޮށް އެދެމެދުގައި މެދުމިން ކުރުމަށް މާތްﷲ އަންގަވާފައިވާ ކަމަށެވެ. ނަމަވެސް ބައެއް މީހުން ކަންކުރަމުންދަނީ އެޔާއި ހިލާފަށް ކަން ފާހަގަކޮށް ހުތުބާގައި ބުނީ، ތިމާގެ އާންމުދަނީއަށް ބެލުމެއްނެތި ބާޒާރަށް އަަލަށް އަންނަ ކޮންމެ އެއްޗެއް ބައެއް މީހުން ހޯދާ ކަމަށާއި، ދަރިންގެ ކުޅޭ އެއްޗެހި ބާ ނުވަނީސް އާ އެއްޗެހި ގަނެދީ، ހަދާ ކަމަށެވެ. އަދި އަތުގައި ފުއްދުންތެރިކަން ނެތަސް ދަރަނި ނުވަތަ ލޯނުނަގައިގެންނާއި، ސަލާންޖަހައިގެން ވެސް ބޭކާރު ހަރަދުތައް ކުރާ ކަމަށެވެ.
މުދަލަށް ދަހިވެތިވުމުގެ ނުބައިކަމާއި ފުދުންތެރިވުމުގެ ހެޔޮކަން ރަސޫލާގެ ހަދީސްތަކުން ވެސް ސާބިތުވެއެވެ. މާތްﷲގެ ރުއްސުންލެއްވި ހަކީމު ބުން ހުޒާމުގެ އަރިހުން ރިވާވެގެނެ ވެއެވެ. އެކަލޭގެފާނު ވިިދާޅުވި އެވެ. ތިމަންނާއަށް އެއްޗެއް ދެއްވުން އެދި ރަސޫލާއަށް ދެންނެވީމެވެ. އެކަލޭގެފާނު ތިމަން އެދުނު އެއްޗެއް ތިމަންނާއަށް ދެއްވި އެވެ. އެޔަށްފަހު އަދިވެސް ތިމަންނާއަށް އިތުރަށް ދެއްވުމަށް އެދުނީމެވެ. އެކަލޭގެފާނު ތިމަންނައަށް ދެއްވި އެވެ. އަނެއްކާވެސް ތިމަންނާއަށް ދެެއްވުމަށް އެދިއްޖައީމެވެ. އެހިދު އެކަލޭގެފާނު ތިމަންނައަށް ދެއްވި އެވެ. އަދި ތިމަންނާއާއި މުހާތަބު ކުރައްވާ ހަދީސް ކުރެއްވި އެވެ.
ހާޖަތްތެރީންގެ ބޭނުންތައް ފުއްދުމަށް ދަރަނި ނެގުމަކީ ހުއްދަ ކަމެއް ނަމަވެސް، އެ ދަރަނި ފުއްދުމަށް އަވަސްވެގަންނަންޖެހޭކަން ހުތުބާގައި ފާހަގަކުރި އެވެ. އެއީ އިންސާނުންގެ ދިރިއުޅުމަކީ އޭގެ މިންވަރު ކަނޑައެޅިފައިވާ އެއްޗަކަށްވުމުން ނެވެ.
ދުނިޔޭގައި ހޭދަކުރާ ދުވަސްތަކަކީ އަޖަލު ކަނޑައެޅިފައިވާ މަދު ދުވަސްތަކެއް ކަމުން، މީހުންގެ ހައްގުތަކާއި، ދަރަނިތައް އަދާކޮށް އަބަދުވެސް ހުންނަންޖެހޭނީ މަރަށް ތައްޔާރުވެގެން ކަމަށް ހުތުބާގައި ބުންޏެވެ. މީހުންގެ ދަރަންޏާއި، ހައްގުތައް އަދާނުކޮށް ހުއްޓައި އެމީހެއްގެ މަރު ގެންދަވައިފި މީހާއަށް އޮތީ ފާފަޔާއި، ނުރައްކާ ބޮޑުވެގެންވާ އަޒާބު ކަން ހުތުބާގައި ފާހަގަކުރި އެވެ.
