މިއަދު އޮތް ނޫސްވެރިންގެ ބައްދަލުވުމުގައި ނަޝީދު ވިދާޅުވީ، އެންމެ ބޮޑަށް އެމަނިކުފާނު ހިތްހަމަ ނުޖެހުން އުފެދުނީ، އަތޮޅު ކައުންސިލުގެ އިހްތިސޯސް މައްސަލާގައި ކަމަށެވެ.
އެކަން ކުރެއްވީވެސް އަގުލަބިއްޔަތު އޮތަތީ ކަން ފާހަގަކުރައްވާ ނަޝީދު ވިދާޅުވީ، ރައްޔިތުންގެ މަޖިލީހުގެ ކޮންޓްރޯލް އޮތީ ރައީސް ސޯލިހުގެ އަތްޕުޅުގައި ކަމަށް އަމިއްލަފުޅަށް އެމަނިކުފާނު ވިދާޅުވަމުން ދިޔަކަމަށާއި، އެ ކޮންޓްރޯލް ބޭނުންކޮށްގެން ސަރުކާރު ބޭނުންވާ ކޮންމެ ކަމެއް ބޭނުން ގޮތަކަށް ކުރައްވަމުން ގެންދަވާ ކަމަށެވެ.
މަޖިލީހެއްގައި ކަންކަން ފާސްވެގެން ނިންމުންތައް ނިންމިގެން ދަނީ، އަގުލަބިއްޔަތު އޮތް ބައެއް ބޭނުންވާ ގޮތަށް ކަމުން، ރައީސް ވަނީ އެކިގޮތްގޮތުން އެ އަގުލަބިއްޔަތު ހޯއްދަވާފައި ކަން ފާހަގަކުރައްވާ، ނަޝީދު ވިދާޅުވީ، އެ ބާރުގެ ބޭނުންކޮށްގެން ޓެކްސް ބިލު ފާސްކުރެއްވި ގޮތާއިމެދުވެސް ހިތްހަމަ ނުޖެހުންތައް އެބަހުރި ކަމަށެވެ.
ނަޝީދު މީގެ ކުރިން ވެސް ވަނީ، ރައީސް ސޯލިހުވެސް އެމަނިކުފާނާއި މަޝްވަރާކޮށްގެން އަދި ވާހަކަދައްކައިގެން ކަންކަން ކުރަން ބޭނުންފުޅުވާ ނުވާތީ ދެން ރައީސް ސޯލިހް އާއި ވާހަކަދައްކަވަ އެމަނިކުފާނުވެސް ބޭނުން ނުވާ ކަމަށް ބުނެ އެކި ފަހަރުމަތިން ހިތްހަމަ ނުޖެހުން ފާޅުކޮށްފަ އެވެ.
އެކަމަށް އިޝާރާތް ކުރައްވާ ރައީސް ސޯލިހް މިފަހުން ކެމްޕެއިން ޖަލްސާއެއްގައި ވިދާޅުވެފައިވަނީ، މަޝްވަރާ ދެއްވާ ވާހަކަތައް ހިއްސާކޮށްފިނަ އަޑުއަހާނެ ކަމަށާއި، އެކަމަކު އެއްވެސް މީހެއްގެ "އަޅަކަށް ނުވެވޭނެ" ކަމަށެވެ. އެމަނިކުފާނު ވިދާޅުވީ، ކަންތައްތައް ނިންމާނީ ހުރިހާ ރައްޔިތުންނަށް ފައިދާ ވާގޮތަށް ކަމަށެވެ. އަދި ކޯލިޝަނާއި ކެބިނެޓުގެ ވަޒީރުންނާއި، ޕާޓީގެ މެމްބަރުންނާއިވެސް މަޝްވަރާ ކުރައްވާފައި ކަމަށެވެ.
