އެމްއެންޑީއެފުން ބުނީ މާލެ ސިޓީ، ނީލަން ފިހާރަ ސަރަހައްދުގައި އަލިފާން ރޯވެގެން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވާން ފަށާފައިވަނީ ފަތިހުގެ ވަގުތުގައި ކަމުގައެވެ.
ދޭތެރެ ދޭތެރެއިން އަލިފާނުގެ ހާދިސާތައް ހިނގަމުން އަންނަ ނީލަން ފިހާރަ ސަރަހައްދަކީ ބޭނުން ކޮށްފައިހުންނަ ތަކެއްޗާއި، އަގުހެޔޮކޮށް ވިއްކާ ބައެއް ތަކެތި އަދި ގިނަ އަދަދެއްގެ ލަކުޑި ވިއްކަން ހުންނަ ތަނެކެވެ.
އަލިފާނުގެ ހާދިސާގެ ރިޕޯޓް އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުނީ މިއަދު ހެނދުނު 05:43 ހާއިރު ކަމަށްވެސް އެމްއެންޑީއެފުން ބުންޏެވެ. އަދި އެމްއެންޑީއެފް ފަޔަރ އެންޑް ރެސްކިއުސާރވިސްއާއި ވެލާނާ އެއާޕޯޓްގެ ފަޔަރ ގުޅިގެން މިހާރު އަލިފާންގަނޑު ގެ 70 އިންސައްތަ ކޮންޓްރޯލްކޮށްފައި ކަމަށް އެމްއެންޑީއެފުން ބުނެއެވެ.
ނީލަން ފިހާރަތައް ހުންނަ މަގުގެ އަނެއް ފަރާތުގައި ހުންނަ ބިދޭސީން އުޅޭ ކޮށިތަކުން ބައިވަރު ބިދޭސީން ފޮށި ތަންމަތި ހިފައިގެން ނުކުމެ ބޭރު މަގު ތޮށި މަތީ އެބަތިއްބެވެ.
މާލޭ ކުރީގެ އެއް ނަމްބަރު ކުނިކޮށްޓާއި ޕޮލިސް ވެހިކަލު ގަރާޖާއި ދެމެގުގައި ހިންގަމުން ގެންދާ ނީލަން ފިހާރަ ސަރަހައްދުގެ މަގުމަތީގެ ދެފަރާތުގައިވެސް މީހުން ތަކެތި ބަހައްޓައިގެން ވިޔަފާރިކުރާ މައަސަލާގައި މާލޭ ސިޓީ ކައުންސިލުން މިފަހުންވަނީ ކަންބޮޑުވުން ފާޅުކޮށްފައެވެ. އަދި އެކަން ހުއްޓުވައި ދިނުމަށް ފުލުހުނަނަށް ސިޓީ ކައުންސިލުންވަނީ ހުށަހަޅާފައެވެ.