ވ.އާރަށު މައްސަލާގައި 11 އަހަރުގެ ޖަލު ހުކުމެއް ޔާމީންގެ މައްޗަށް އިއްވީ ޕީޕީއެމްގެ ރިޔާސީ ޓިކެޓު އެމަނިކުފާނާއި ހަވާލުކޮށް، ވަރުގަދަ ކެމްޕެއިންތަކެއް ކުރަމުން ދަނިކޮށް މިދިޔަ ޑިސެމްބަރު މަހުގެ 25 ވަނަ ދުވަހު އެވެ.
ޔާމީން އަށް އައި ޖަލު ހުކުމާއި ގުޅިގެން އަންނަ ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލިދާނެ ކަމުގެ ބިރުހީވެފައިވާ މިދަނޑިވަޅުގައި އެ ހުކުމް ވީހާވެސް އަވަަހަށް އިސްތިއުނާފު ކުރާނެކަމަށް ވަކީލުން އެދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވި އެވެ.
އެ ހުކުމް އިސްތިއުނާފް ކުރުން ލަސްވަމުންދާތީ އެކަމުގެ ކަންބޮޑުވުންތައް ފާޅުކުރަން ފެށުމުން މިމަހުގެ 10 ވަނަ ދުވަހު ޔާމީންގެ ވަކީލުންގެ ޓީމުގައި ހިމެނިވަޑައިގަންނަވާ އަބްދުﷲ ޝިޔާޒު ވިދާޅުވިގޮތުން، ޔާމީންގެ މައްޗަށް ހުކުމް ކުރި ދުވަހު ވެސް ޝަރީއަތް ނިމުނު ގޮތުގެ ރިޕޯޓު، މަހުޟަރު ބަޔާންތަކާ އެކު ދޭން އެ ޓީމުން އެދިފައިވާނެ އެވެ. ކޯޓުގައި ދެ ފަރާތުން ދައްކާފައިވާ ވާހަކަތައް ތަފްސީލުކޮށް އެނގެން އޮންނަ އެ މަހުޟަރު ބަޔާނަކީ އިސްތިއުނާފުގެ އެއް މަސްދަރު ކަމަށް ޝިޔާޒް ވިދާޅުވިި އެވެ.
ނަމަވެސް އެލިއުންތައް ލިބިފައި ނުވާކަމަށާއި، ހުކުމް އިއްވާ ދުވަހު ހުލާސާ ރިޕޯޓު ދޭން ޖެހޭ ނަމަވެސް، އެ ރިޕޯޓު ނުދީގެން އިހްތިޖާޖު ކުރުމުން، ހުކުމްކުރިތާ އެއް ދުވަސްފަހުން ވެސް ކޯޓުން ހަވާލުކުރީ ޝަަރީއަތުގެ ހުލާސާއެއް ކަން ވަކީލް ޝިޔާޒް ފާހަގަކުރެއްވި އެވެ.
އެކަމާއި ގުޅިގެން އެދުވަހު ކްރިމިނަލް ކޯޓުން "ސީއެންއެމް" އަށް ބުނީ، ފުރިހަމަ ރިޕޯޓާއި ބަޔާންތައް، ގާނޫނުގައި އޮންނަ 14 ދުވަހުގެ މުއްދަތުގެ ތެރޭގައި ހަވާލުކުރާނެ ކަމަށެވެ. މި މުއްދަތު ހަމަވަނީ މިއަދު އެވެ.
ފުރިހަމަ ރިޕޯޓާއި ބަޔާންތައް މިއަދު ލިބުނުކަން ފާހަގަކޮށް ޔާމީންގެ ޓީމުގައި ހިމެނިވަޑައިގަންނަވާ ވަކީލު އާދަމް ޝަމީމް މިއަދު ވިދާޅުވީ "ކުރިއަށް އޮތީ ބުރަ ދުވަސްތަކެއް" ކަމަށެވެ.
މިއަދު ހަވާލުކުރި ރިޕޯޓާއި ބަޔާންތައް——ފޮޓޯ: ވަކީލް ޝަމީމް
ފުރިހަމަ ރިޕޯޓާއި ބަޔާންތައް މިއަދު ހަވާލުކުރުމާއިއެކު، ޔާމީންގެ މައްޗަށް އިއްވާފައިވާ ހުކްމް އިސްތިއުނާފް ކުރުމުގެ މަސައްކަތް ޔާމީންގެ ވަކީލުންގެ ޓީމުން މިހާރު ފަށާފައިވާއިރު، އިސްތިއުނާފަށް ހުށަހެޅުމަށް މިއަދުން ފެށިގެން ބަންދު ދުވަސްތަކާއި ނުލައި ގާނޫނުގައި ބުނާ 60 ދުވަސް ލިބޭނެ އެވެ.
އާރަށު މައްސަލާގައި ރައީސް ޔާމީންގެ މައްޗަށް އުފުލި ދެ ދައުވާވެސް ސާބިތުވެ ފަސް މިލިއަން ޑޮލަރުގެ ޖޫރިމަނާއަކާއިއެކު 11 އަހަރަށް ޖަލަށް ލާން ކްރިމިނަލް ކޯޓުން ހުކުމް ކުރި އެވެ. ކޯޓުގައި ބޭއްވި އަޑުއެހުމުގައި މަނީ ލޯޑަރިންނާއި، ރިޝްވަތު ގަބޫލުކުރުމުގެ ދައުވާ ސާބިތުވާ ކަމަށް ރައީސް ޔާމީން މައްޗަށް ކަނޑައެޅި އެެވެ.
ރިޝްވަތު ގަބޫލު ކުރުމުގެ ކުށުގެ ދައުވާގެ އަސާސީ އަދަބަކީ ތިން އަހަރާއި ދެ މަހެވެ. އަދި މަނީ ލޯންޑަރިންގެ ދައުވާގެ ކުށުގެ އަދަބުގެ އެންމެ ކުޑަ މިންވަރަކީ ފަސް މަސް ދުވަހެވެ. ނަމަވެސް ދައުލަތުން އެދުނީ އެ ދެ ކުށުގެ އަދަބުވެސް ބޮޑުކޮށްދެވެން އޮތް އެންމެ ބޮޑެއް ކޮށްދިނުމަށެވެ. އެގޮތުން 19 އަހަރުގެ ޖަލު ހުކުމެއް ކަނޑައަޅައި ދިނުމަށް ދައުލަތުން އެދުނެވެ.
މައްސަލައިގެ އަދަބު ކަނޑައެޅުމަށް ބޭއްވި އަޑުއެހުމުގައި ޝަރީއަތުން ހުކުމް ކުރީ:
- ރިޝްވަތުގެ ކުށަށް ހަތަރު އަހަރު
- މަނީ ލޯޑަރިންގެ ކުށަށް ފަސް މިލިއަން ޑޮލަރު( 77 މިލިއަން ރުފިޔާ) ގެ ޖޫރިމަނާ އަކާއިއެކު ހަތް އަހަރުގެ ޖަލު ހުކުމެއް
- އެއީ ޖުމްލަ 11 އަހަރުގެ ޖަލު ހުކުމެކެވެ.
ޔާމީން ޖަލަށް ލި ނަމަވެސް، އެ ޕާޓީގެ ރިޔާސީ ކެންޑިޑަސީ ބަދަލު ނުވާނެ ކަމަށާއި ސްޕްރީމް ކޯޓުގައި އެ ހުކުމް އިސްތިއުނާފްކޮށް ޔާމީން މިނިވަންވާނެ ކަމުގެ ޔަގީންކަން އެބައޮތް ކަމަށް އިދިކޮޅުން ބުންޏެވެ. އިދިކޮޅުން ގަބޫލުކުރަނީ އެ ހުކުމަކީ އަންނަ 2023 ގެ ރިޔާސީ އިންތިހާބުގެ ރޭހުން ޔާމީން އެކަހެރި ކުރުމަށް ދުރާލާ ރާވައިގެން އިއްވި "ހަރާމް ހުކުމެއް" ކަމަށެވެ.
ޖަލު ހުކުމް ތަންފީޒު ކުރުމަށް ދެވަނަ ފަހަރަށް ޔާމީން މާފުށީ ޖަލަށް ގެންދިއުމާއިއެކު އަނެއްކާވެސް އިދިކޮޅުން ވަނީ މަގުމަތީ މުޒާހަރާތައް ފަށާފަ އެވެ. އިދިކޮޅުން ބުނަނީ، ޔާމީންގެ ނަން ނެތް އިންތިހާބެއް ނުބޭއްވޭނެ ކަމަށެވެ.
