ރައީސް ޔާމީންއަށް އިއްވާފައިވާ 11 އަހަރުގެ ޖަލު ހުކުމް އިސްތިއުނާފު ކޮށް، ރިޔާސީ އިންތިހާބުގެ ކުރިން މިނިވަންވެ، އިންތިހާބުގައި ވާދަކުރެއްވޭނެހާ މުއްދަތު މިހާރު އޮތް ކަަމަށް ނުބެލެވޭ ކަމަށް ބުނެ، އެ ކޯލިޝަނުން މިއަދު ބޭއްވި ނޫސްވެރިިންގެ ބައްދަލުވުމުގައި ނޫސްވެރިން ސުވާލުކޮށްފައި ވެއެވެ.
އެ ހާލަތުގައި ޕާޓީން ގެންގުޅޭ ވިސްނުމާއި ބެހޭގޮތުން ސުވާލުކުރުމުން ނޫސްވެރިންގެ ބައްދަލުވުން ލީޑު ކުރައްވަން ހުންނެވި އެ ޕާޓީގެ ތަރުޖަމާން ހީނާ ވަލީދު ވިދާޅުވީ، 2023 ވަނަ އަހަރުގެ ރިޔާސީ އިންތިހާބުގައި ޕީޕީއެމް/ޕީއެންސީ ކޯލިޝަނުގެ ފަރާތުން ވާދަކުރައްވާ ކެންޑިޑޭޓަކީ ރައީސް ޔާމީން ކަމަށާއި، އެކަމަށް ބަދަލެއް ނާންނާނެ ކަމަށެވެ.
އިދިކޮޅު ލީޑަރު ޖަލުގައި ބާއްވައިގެން، އިންތިހާބެއްގެ ކެމްޕެއިންތައް ކޮށް، ރަށްރަށަށް ވަޑައިގެން ރައީސް އިބްރާހިމް މުހަައްމަދު ސޯލިހް ކުރައްވަމުން ގެންދަވާ ކަންކަން ހަރުކަށި އިބާރާތުން ކުށްވެރި ކުރާ ކަމަށްވެސް ހީނާ މިއަދު ވިދާޅުވި އެވެ. ހީނާ ވިދާޅުވީ، އިންސާފުވެރި އިންތިހާބަކަށް ވާނީ، އިދިކޮޅު ލީޑަރަށްވެސް ކެމްޕެއިން ކުރުމުގެ ފުރުސަތު ދީ މިނިވަން ކޮށްފައި ބަހައްޓައިގެން ބާއްވާ އިންތިހާބެއް ކަމަށެވެ.
ވ.އާރަށު މައްސަލާގައި 11 އަހަރުގެ ޖަލު ހުކުމެއް ޔާމީންގެ މައްޗަށް އިއްވީ ޕީޕީއެމްގެ ރިޔާސީ ޓިކެޓު އެމަނިކުފާނާއި ހަވާލުކޮށް، ވަރުގަދަ ކެމްޕެއިންތަކެއް ކުރަމުން ދަނިކޮށް މިދިޔަ ޑިސެމްބަރު މަހުގެ 25 ވަނަ ދުވަހު އެވެ.
ޔާމީން އަށް އައި ޖަލު ހުކުމާއި ގުޅިގެން އަންނަ ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލިދާނެ ކަމުގެ ބިރުހީވެފައިވާ މިދަނޑިވަޅުގައި އެ ހުކުމް ވީހާވެސް އަވަަހަށް އިސްތިއުނާފު ކުރާނެކަމަށް ވަކީލުން އެދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވި އެވެ. އެކަން ލަސްވެފައިވަނީ، ޝަރީއަތް ނިމުނު ގޮތުގެ ރިޕޯޓާ އެކު މަހުޟަރު ބަޔާންތައް ހަވާލު ނުކުރާތީ ކަމަށް ވަކީލުން ވިދާޅުވެފައިވަނިކޮށް، މިމަހުގެ 15 ވަނަ ދުވަހު އެ ލިއުންތައް ކޯޓުން ވަނީ ހަވާލުކޮށްފަ އެވެ.
ރިޕޯޓާއި ބަޔާންތައް ހަވާލުކުރުމާއިއެކު، ޔާމީންގެ މައްޗަށް އިއްވާފައިވާ ހުކްމް އިސްތިއުނާފް ކުރުމުގެ މަސައްކަތް ޔާމީންގެ ވަކީލުންގެ ޓީމުން މިހާރު ވަނީ ފަށާފައެވެ. އިސްތިއުނާފަށް ހުށަހެޅުމަށް ބަންދު ދުވަސްތަކާއި ނުލައި ގާނޫނުގައި ބުނާ 60 ދުވަސް ލިބޭނެ އެވެ.
ޔާމީން ޖަލަށް ލި ނަމަވެސް، އެ ޕާޓީގެ ރިޔާސީ ކެންޑިޑަސީ ބަދަލު ނުވާނެ ކަމަށާއި ސްޕްރީމް ކޯޓުގައި އެ ހުކުމް އިސްތިއުނާފްކޮށް ޔާމީން މިނިވަންވާނެ ކަމުގެ ޔަގީންކަން އެބައޮތް ކަމަށް އިދިކޮޅުން މީގެ ކުރިންވެސް ވަނީ ބުނެފައި ވެއެވެ.
