ތިން އެއްބަސްވުމެއްގައި އިންޑިއާއާއި ރާއްޖެއާއި ދެމެދު ސޮއިކޮށްފައިވަނީ، އިންޑިއާގެ ފޮރިން މިނިސްޓަރު އެސް. ޖައިޝަންކަރު މިހާރު ރާއްޖެ އަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މިއަދު ނ. މަނަދޫގައި ބޭއްވި ރަސްމިޔާތެއްގައެވެ.
ސޮއިކުރި އެއްބަސްވުންތަކަކީ:
- ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް(އެޗްއައިސީޑީޕީ) ސްކީމު ފުޅާކޮށް، އޭގެ ދެވަނަ ފިޔަވައްސެއް ތައާރަފްކުރުމަށް ވެވުނު އެއްބަސްވުމެއް
މި އެއްބަަސްވުމުގެ ދަށުން އެޗްއައިސީޑީޕީ ސްކީމަށް 100 މިލިއަން ރުފިޔާ އިތުރުކުރުމަށް އެއްބަސްވެފައި ވެއެވެ. ފޮރިން މިނިސްޓްރީން ބުނީ، އެ ސްކީމުގެ ދެވަނަ ފިޔަވައްސެއް ތައާރަފްކޮށް ސްކީމް ފުޅާކުރުމަކީ ލޯކަލް ކޮމިއުނިޓީތަކުގެ ދިރިއުޅުމުގެ ފެންވަރާއި ދުޅަހެޔޮކަން މުއްސަނދިކުރާ އާ މަޝްރޫއުތަކާއި ވެންޗަތައް ހިންގުމަށް ލިބުނު ބޮޑު ކުރިއެރުމެއް ކަމަށެވެ.
އެޗްއައިސީޕީޑީ ސްކީމް އިތުރުކުރުމަށް އެއްބަސްވުން ބަދަލުކުރަނީ---
- ގދ.ގައްދޫގައި ސްޕޯޓްސް ކޮމްޕްލެކްސްއެއް ތަރައްގީކުރުމަށް
މި އެއްބަސްވުމުގެ ދަށުން ތަރައްގީކުރާ ސްޕޯޓްސް ކޮމްޕްލެކްސްގައި ބެޑްމިންޓަން، ނެޓްބޯޅަ، ވޮލީބޯޅަ، ކެރަމް، އަދި ބިލިއާޑް ފަދަ ކުޅިވަރުތަކަށް ކެޓަރިން ކުރާ މަލްޓި ޕާޕަސް ސްޕޯޓްސް ފެސިލިޓީއެއް ތަރައްގީކުރެވިގެންދާނެ ކަމަށް ފޮރިން މިނިސްޓްރީން ބުންޏެވެ.
ގައްދޫ ސްޕޯޓްސް ކޮމްޕްލެކްސް އެއްބަސްވުން ބަދަލުކުރަނީ
- ގައުމީ ޔުނިވާސިޓީ އާއި ކޮޗިން ޔުނިވާސިޓީ އޮފް ސައިންސް(ސީޔޫއެސްއޭޓީ) އާއި ދެމެދު ވެވުނު އެއްބަސްވުމެއް
މި އެއްބަސްވުމުގެ ދަށުން މަތީ ތައުލީމާއި، ދިރާސާ، ޑިވެލޮޕްމަންޓް އިންސްޓްރަކްޝަން، ކޮމިއުނިޓީ ސާވިސް ފަދަ ދާއިރާތަކުން ދެ ޔުނިވާަސިޓީގެ ދެމެދުގައި ފަންނީ އަދި އެހެނިހެން ގޮތްގޮތުން އެހީތައް ބަދަލުކުރެވިގެން ދާނެ އެވެ. އަދި، މުވައްޒަފުންނާއި، ދަރިވަރުން ބަދަލުކުރުމުގެ ދާއިރާއިންވެސް ދެ ޔުނިވާސިޓީގެ ދެމެދުގައި އެހީތެރިކަން ފޯރުކޮށްދޭނެ އެވެ.
އެމްއެންޔޫ އާއި ސީޔޫއެސްއޭޓީ ޔުނިވާސިޓީ އާއި ދެމެދު އެއްބަސްވުން ބަދަލުކުރައްވަނީ
އެއްބަސްވުންތަކުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު އަބްދުﷲ ޝާހިދު ވިދާޅުވިގޮތުގައި، މިދިޔަ އަހަރު އެކަނިވެސް 18 އެއްބަސްވުމެއްގައި އިންޑިއާ އާއި ރާއްޖެ އާއި ދެމެދު ވަނީ ސޮއިކޮށްފައެވެ، އަދި ކުރެޑިޓަށްވެސް އިންޑިއާއިން އެއަންނަނީ ފައިސާގެ އެހީތެރިކަން ފޯރުކޮށްދެމުން ކަމަށާއި، 2000 ސޯޝަލް ހައުސިން އެޅުމަށްޓަކައިވެސް އިންޑިއާއިން އެހީތެރިކަން ފޯރުކޮށްދެމުންދާ ކަމަށް ވިިދާޅުވި އެވެ.
