މިއަދު ހެނދުނު މުއިއްޒު ކުރެއްވި ޓްވީޓެއްގައި ރޭ ދަންވަރު، ސިޓީ ކައުންސިލްގެ ހުއްދަ ހޯދުމަކާއި ނުލައި، ވިލިމާލެއަށް ބަސްތަކެއް އަރުވާފައިވާ ކަމަށާއި އެކަން ފުލުހުންނާއި އެލްޖީއޭގެ ސަމާލު ކަމަށް ގެނެސްފައިވާ މޭޔަރު މުއިއްޒު ވިދާޅުވެފައިވާއިރު، މި ބަސްތަކަކީ ވިލިމާލޭގައި އާއްމު ދަތުރުފަތުރަށް އެމްޓީސީސީން ގެންދިޔަ ބަސްތަކެވެ. އެމްޓީސީން ކުރި ޓްވީޓެއްގައި ބަސްތައް ގެންގޮސްފައިވާކަން ހާމަކޮށްފައިވެއެވެ.
އެމްޓީސީސީން ވިލިމާލޭގައި ބަހުގެ ހިދުމަތް ދޭން ފަށަން ތައްޔާރުވިއިރު، މާލޭ ސިޓީ ކައުންސިލުން އަންނަނީ ވިލިމާލެއަށް ބަގީ ހިދުމަތް ފަށަން ތައްޔާރުވަމުންނެވެ. ސިޓީ ކައުންސިލުން ބަގީގެ ހިދުމަތް ފެށުމުގެ މަގުމަތީ އުޅެނިކޮށް އެމްޓީސީސީގެ ބަހުގެ ހިދުމަތް ފަށާނީ މޭޔަރުވަނީ ކުރިންވެސް ނުރުހުން ފާޅުކުރައްވާފައެވެ.
ވިލިމާލޭގައި އާންމު ދަތުރުފަތުރަށް ބޭނުން ކުރަނީ ބަގީގެ ހިދުމަތެވެ. އިންޖީނުލީ އުޅަނދުތައް ބޭނުމެއް ނުކުރެ އެވެ. ސިޓީ ކައުންސިލްގެ މިދިޔަ ދައުރުގައި އެރަށުގައި ބަގީގެ ހިދުމަތް ދިނުމަށް ހަވާލުކޮށްފައިވަނީ އިމްޕްރިންޓް ނަމަކަށް ކިޔާ ކުންފުންޏަކާއި ނަމަވެސް، އެ ކުންފުނިން އެއްގޮތަކަށް އެ ހިދުމަތް ނުދޭތާ ހަތަރު މަސް ވެއްޖެ ކަމަށް އެކައުންސިލްގެ ވިލިމާލޭ މެންބަރު ނަހުލާ މީގެ ކުރިން ވަނީ ވިދާޅުވެފަ އެވެ.
