ސައިރިކްސް ކޮލެޖާއި އެމްއެސްޔޫ އާއި ދެމެދު އާދިއްތަ ދުވަހު ވެވެނު އެމްއޯޔޫގެ ދަށުން، އެމްއެސްޔޫގެ ޑިގްރީ އަދި މާސްޓާސް ކޯސްތައް ސައިރިކްސް ކޮލެޖުން ހެދިގެންދާނެއެވެ. ސައިރިކްސް ކޮލެޖުން ހެދިގެންދާ އެމްއެސްޔޫ ކޯސްތަކުގެ ތެރޭގައި ސައިކޮލޮޖީ، އެޑިއުކޭޝަން، ބިޒްނަސް އަދި ހޮޓެލް މެނޭޖްމެންޓްގެ ކޯސްތައް ހިމެނެ އެވެ.
މި އެއްބަސްވުމުގެ ދަށުން، ދެ ކޮލެޖުގެ ދެމެދުގައި އެކްސްޗޭންޖް ޕްރޮގްރާމްތަކެއްވެސް ހިންގުމަށްވަނީ ހަމަޖެހިފައެވެ. އެގޮތުން ސްޓާފުން ތަމްރީނު ކުރުމަށް އެމްއެސްޔޫގެ ސްޓާފުން ސައިިރިކްސް ކޮލެޖަށް އައުމާއި އަމަލީ ތަމްރީން ލިބިގަތުމަށް ސައިރިކްސް ކޮލެޖުގެ ސްޓާފުން މެލޭޝިއާއަށް ގޮސް އެމްއެސްޔޫގައި މަސައްކަތް ކުރުމުގެ ފުރުސަތު ލިބިގެންދާނެ ކަމަށް ސައިރިކްސް ކޮލެޖުން މައުލޫމާތު ދެއެވެ.
ތަފާތު ސްޓޫޑެންޓް އެކްސްޗޭންޖް ޕްރޮގްރާމްތައް ވެސް މި އެއްބަސްވުމުގެ ދަށުން ހިންގޭނެ ކަމަށާއި އެގޮތުން ސެމިސްޓާއެއް މެލޭޝިއާގައި ކިޔެވުމުގެ ފުރުސަތު ސައިރިކްސް ގެ ދަރިވަރުންނަށް ލިބިގެންދާނެ ކަމަށް ސައިރިކްސް އިން މައުލޫމާތުދެއެވެ. މެލޭޝިއާގެ ދަރިވަރުންވެސް ރާއްޖެ އައިސް ސައިރިކްސްގައި ކިޔެވުމުގެ ފުރުސަތު މި އެއްބަސްވުމުގެ ދަށުން ލިބިގެންދާނެއެވެ. ދިގު އަދި ކުރު މުއްދަތުގެ އެކްސްޗޭންޖް ޕްރޮގްރާމްގައި ބައިވެރިވުމުގެ ފުރުސަތު މި އެއްބަސްވުމުގެ ދަށުން ދަރިވަރުންނަށް ލިބިގެންދާނެއެވެ.
އެއްބަސްވުމުގައި ސޮއިކުުރުމަށް ސައިރިކްސް ކޮލެޖުގައި އޮތް ހާއްސަ ރަސްމިއްޔާތެއްގައި އެ ކޮލެޖުގެ ފަރާތުން ސޮއި ކުރައްވާފައިވަނީ ކޮލެޖުގެ ރެކްޓާ އެވެ. އަދި އެމްއެސްޔޫގެ ފަރާތުން ސޮއި ކުރެއްވީ އެ ޔުނިވާސިޓީގެ ވައިސް ޗާންސިލާއެވެ.
ސައިރިކްސް ކޮލެޖުން ހަދާ އެމްއެސްޔޫގެ ކޯސްތައް ފުރިހަމަ ކުރެއްވުމުން، އެމްއެސްޔޫގެ ސެޓްފިކެޓް ލިބިގެންދާނެއެވެ.
