މިމައްސަލަ ތަހުގީގު ކުރެއްވުމުގައި ލ. ގަމު ޕޮލިސް ސްޓޭޝަނުގެ ސީނިއަ ސާޖެންޓު ހުސެއިން އާދިލް ކުރެއްވި މަސައްކަތައް ތައުރީފު ކުރައްވާ އޭނާއަށް ސީޕީ ވަނީ މަރުހަބާ ދަންނަވާފަ އެވެ. ކުޑަކުއްޖާ ރޭޕްކުރިކަން ސާބިތުވި މީހާއަށް 40 އަހަރުގެ ޖުލު ހުކުމެއް އިއްވުމުގައި ސާޖެންޓު ހުސެއިން އާދިލް އަދާކުރެއްވި މަސައްކަތް ސީޕީ ފާހަގަކުރެއްވި އެވެ.
ކުޑަކުއްޖަކު ވަލުތެރެއަށް ވައްދާ ރޭޕުކޮށް ވީޑިއޯކުރިކަން ސާބިތުވެ، ލ. ކަލައިދޫ، މާކަރީލައިޓް، މުހައްމަދު ޝަޒްލީފްގެ މައްޗަށް 40 އަހަރުގެ ޖަލު ހުކުމެއް ކްރިމިނަލް ކޯޓުން މިދިޔަ ބުދަ ދުވަހު ވަނީ އިއްވާފަ އެވެ.
މައްސަލައަށް ފަސް އަހަރުވާން ގާތްވެފައި ވަނިކޮށް ތުހުމަތުކުރެވޭ މީހާގެ މައްޗަށް ހުކުމް އިއްވުނު މި މައްސަލައަކީ، 2018 ވަނަ އަަހަރު، ލ. ކަލައިދޫ ދަނޑުބިން ސަރަހައްދު ވަލުތެރެއަށް 17 އަހަރުގެ ކުޑަކުއްޖަކު ގަދަކަމުން ވައްދާ ރޭޕުކޮށް، ކުޑަކުއްޖަކު މެދުވެރިކޮށް އޮރިޔާންކާޑު އުފެއްދި ކަމުގެ ތުހުމަތުގައި ހައްޔަރުކޮށްފައިވާ ޝަޒްލީފާއި ދެކޮޅަށް އެއަހަރުގެ ފެބްރުއަރީ 15 ވަނަ ދުވަހު ދައުލަތުން ކޯޓަށް ހުށަހެޅި މައްސަލައެކެވެ.
މި މައްސަލާގައި ދައުލަތުން ދައުވާކުރީ:
- ރޭޕްކުރުމުގެ ކުށުގެ ދައުވާ
- ކުޑަކުއްޖަކު މެދުވެރިކޮށް އޮރިޔާންކާޑު އުފެއްދުމުގެ ކުށުގެ ދައުވާ
ދައުލަތުން ބުނެފައިވާގޮތުގައި، 17 އަހަރުގެ ކުޑަކުއްޖާ، ގަދަކަމުން ކަލައިދޫ ދަނޑުބިން ސަރަހައްދު ވަލުތެރެއަށް ޝަޒްލީފް ވައްދާފައިވަނީ، 2018 ވަނަ އަހަރުގެ ޖަނަވަރީ ހަވަނަ ދުވަހުގެރޭ މެންދަމުގެ ވަގުތެއްގަ އެވެ. އަދި ގަދަކަމުން ޖިންސީ ގުޅުން ހިންގައި، ކުއްޖާގެ ބަރަހަނާ މަންޒަރު ފެންނަ ފޮޓޯއާއި ވީޑިއޯ ޝަޒްލީފް ނަގާފައި ވެއެވެ.
އަދަބު ކަނޑައެޅިގޮތް:
- ރޭޕްގެ ކުށް ސާބިތުވެފައިވާތީ ޖިންސީ ކުށުގެ ގާނޫނުގެ ދަށުން، 20 އަހަރަށް ޖަލަށްލުމަށް ހުކުމް ކުރި
- ކުޑަކުއްޖަކު މެދުވެރިކޮށް އޮރިޔާންކާޑު އުފެއްދުމުގެ ކުށް ސާބިތުވެފައިވާތީ، ކުޑަކުދިންނަށް ޖީންސީ ގޯނާ ކުރާ މީހުންނާމެދު ހާއްސަ އުސޫލުތަކަކުން އަމަލުކުރުމުގެ ގާނޫނުގެ ދަށުން، 20 އަހަރަށް ޖަލަށްލުމަށް ހުކުމްކުރި
ހާދިސާއަށް ގާތްގަނޑަށް ފަސް އަހަރުވާން ގާތްވެފައިވަނިކޮށް ކްރިމިނަލް ކޯޓުން އިއްވި ހުކުމުގައި، ޖުމްލަ 40 އަހަރަށް އޭނާ ޖަލަށްލުމަށް ހުކުމް ކޮށްފައި ވެއެވެ. ނަމަވެސް، އެ މުއްދަތުން ޝަރީއަތް ނިމެންދެން ބަންދުގައި ހުރި މުއްދަތު ކަމުގައިވާ 2 އަހަރާއި 1 މަހާއި 14 ދުވަސް އުނިކުރުމުން އޭނާ މިހާރު ތަންފީޒުކުރަންޖެހޭ ޖަލު އަދަބަކީ 38 އަހަރުގެ ޖަލު އަދަބެކެވެ.
