ކުރީގެ އިސްލާމިކް މިނިސްޓަރު އަދި އެންމެ ފަހުން އޮތް ރިޔާސީ އިންތިހާބުގައި ރައީސް ޔާމީންގެ ރަނިން މޭޓެއްގެ ގޮތުގައި ހުންނެވި ޑރ. ޝަހީމް މިހެން ވިދާޅުވީ ހޮނިހިރު ދުވަހު ކުރެއްވި ޓްވީޓެއްގައެވެ. ޑރ. ޝަހީމްގެ ޓްވީޓުގައި ވިދާޅުވީ، އިސްލާމްދީނުގައި ހައްގަކީ ވަރަށް މަތިވެރި އެއްޗެއް ކަމަށާއި ހައްގު ބުނެދިނުމާއި ހައްގު ގާއިމުކުރުން އޮތީ އަދުލުވެރިކަމާއި އިހުސާންތެރިކަމުގެ މަތިން ކަމަށެވެ.

ޑރ. ޝަހީމްގެ މި ޓްވީޓުއައީ ސީދާ ވަކި ފަރާތަކަށް އަމާޒުކޮށް ކަމެއް ސާފުކޮށް އެނގޭކަށް ނެތެވެ. އިސްލާމްދީނާ ހިލާފު ހިޔާލުތަކަށް އިސްލާމީ މުޖުތަމައުގައި ފުރުސަތު އޮވެގެން ނުވާނެ ކަމަށްވެސް މީގެ ދުވަސްކޮޅެއް ކުރިން ޑރ. ޝަހީމް ވިދާޅުވެފައިވެއެވެ.

މެދުމިނުގެ ސިޔާސަތަކަށް ތާއީދު ކުރައްވާ ޑރ. ޝަހީމްއަކީ ޕީޕީއެމްގެ މެންބަރުންގެ މެދުގައި މަގްބޫލް އަދި ރައީސް ޔާމީންވެސް އެންމެ އިތުބާރު ކުރައްވާ ބޭފުޅުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އެހެންނަމަވެސް ސިޔާސީ ގޮތުން ޑރ. ޝަހީމް މި ފަހުން އެހާ އެކްޓިވްއެއް ނޫނެވެ.

ވަކިމީހެއްގެ ނަން ވިދާޅުނުވެ ޑރ ޝަހީމް މިހެން ވިދާޅުވިއިރު ޑރ. އިޔާޒް މިއަދު ކުރެއްވި ޓުވީޓެއްގައި ވިދާޅުވީ، ރާއްޖޭގެ ވެރިކަން ޕީޕީއެމް އަށް ލިބޭނީ، މިމަހުގެ 28 ވަނަ ދުވަހު ބާއްވާ އެމްޑީޕީގެ ޕްރައިމެރީ ރައީސް މުހައްމަދު ނަޝީދު ކާމިޔާބު ކޮށްފިނަމަ ކަމަށެވެ. އަދި އެކަމަށް ޕީޕީއެމްގެ ތެރެއިންވެސް މަސައްކަތް ކުރަމުން އަންނަ ކަމަށް އިޔާޒް ވަނީ ވިދާޅުވެފަ އެވެ.  

އެހެންކަމުން ބެލެވޭގޮތުގައި ޑރ ޝަހީމްގެ ޓްވިޓް އަމާޒު ކުރައްވާފައިވަނީ ޑރ އިޔާޒަށެވެ.