މި ދެ މަޝްރޫއު އެމްޓީސީސީ އާ ހަވާލުކުރުމަށް ޕްލޭނިން މިނިސްޓްރީގައި ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޗީފް އެގްޒެކެޓިވް އޮފިސަ އާދަމް އާޒިމެވެ. ޕްލޭނިން މިނިސްޓްރީގެ ފަރާތުން ސޮއިކުރެއްވީ ޑިރެކްޓަ ޖެނެރަލް ފާތުމަތު ޝާނާ ފާރޫގެވެ.

ކަލައިދޫ އަދި ދަނބިދޫ ކޯޒްވޭ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:

• 271 މީޓަރު ރިވެޓްމެންޓް ޖެހުން
• ކަލައިދޫ އިން ދަނބިދޫ އަށް 225 މީޓަރުގެ ތިން ބްރިޖް އެޅުން
• 85 މީޓަރުގެ މަގު ހެދުން

ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީ އާ ހަވާލުކޮށްފައިވަނީ 155.94 މިލިއަން ރުފިޔާ އަށް 550 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.

ހިތަދޫ - މެންދޫ - ކުނަހަންދޫ ކޯޒްވޭ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:

• 390 މީޓަރު ރިވެޓްމެންޓް ޖެހުން
• ކަލައިދޫ އިން މެންދޫ އަށް 157.5 މީޓަރުގެ ބްރިޖް އެޅުން
• މެންދޫ އިން ކުނަހަންދޫ އަށް 157.5 މީޓަރުގެ ބްރިޖް އެޅުން
• 714 މީޓަރުގެ މަގު ހެދުން

ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީ އާ ހަވާލުކޮށްފައިވަނީ 81.22 މިލިއަން ރުފިޔާ އަށް 500 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.

މި ދެ މަޝްރޫއުގެ ދަށުން ހިތަދޫ އާއި ކުނަހަންދޫ އަދި ކަލައިދޫ އާއި ދަނބިދޫ ކޯޒްވޭއަކުން ގުޅާލެވޭނެއެވެ.