މި ތިން މަޝްރޫއު ފެނަކަ އާ ހަވާލުކުރުމަށް ޕްލޭނިން މިނިސްޓްރީގައި ބޭއްވި ރަސްމިއްޔާތުގައި ފެނަކައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ސައީދު މުހައްމަދެވެ. ޕްލޭނިން މިނިސްޓްރީގެ ފަރާތުން ސޮއިކުރެއްވީ ޑިރެކްޓަ ޖެނެރަލް ފާތުމަތު ޝާނާ ފާރޫގެވެ.
ވިލިނގިލި އަލަށް އާބާދުވި ސަރަހައްދު އަދި ހިއްކި ބިމުގައި ނަރުދަމާ ނިޒާމް ގާއިމުކުރުމުގެ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- ނަރުދަމާ ހޮޅި އެޅުން
- ޕަންޕް ސްޓޭޝަން ބެހެއްޓުން
- ނަރުދަމާ ޖަންކްޝަން ބެހެއްޓުން
- ސީ އައުޓްފޯލް އެއް އެޅުން
ޕްލޭނިން މިނިސްޓްރީގެ ފަރާތުން މި މަޝްރޫއު ފެނަކަ އާ ހަވާލުކޮށްފައިވަނީ 43.88 މިލިއަން ރުފިޔާ އަށް 480 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
ހިތަދޫ އަލަށް އާބާދުވާ ސަރަހައްދުގައި ފެނާއި ނަރުދަމާ ނިޒާމް ގާއިމުކުރެވިފައި ނުވާ ހިސާބުތަކުގައި، ފެނާއި ނަރުދަމާ ނިޒާމް ގާއިމުކުރުމުގެ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- ނަރުދަމާ ހޮޅި އެޅުން
- ނަރުދަމާ ޖަންކްޝަން ބެހެއްޓުން
- ފެނުގެ ވިއުގައެއް އެޅުން
- ފެން މީޓަރުތައް ބެހެއްޓުމާ އެކު، މިހާރު ހިތަދޫގައި ދެމުންދާ ފެނާއި ނަރުދަމާގެ ނިޒާމާ ގުޅާލުން
ޕްލޭނިން މިނިސްޓްރީގެ ފަރާތުން މި މަޝްރޫއު ފެނަކަ އާ ހަވާލުކޮށްފައިވަނީ 21.52 މިލިއަން ރުފިޔާ އަށް 350 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
ނިލަންދޫގައި މިހާރު ހުރި ވެކިއުމް ސްވަރޭޖް ސިސްޓަމް ތަރައްގީ ކުރުމުގެ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- ނަރުދަމާ ނިޒާމުގެ ވެކިއުމް ސްޓޭޝަން ހެދުން
- ޕަންޕްތަކާއި އެހެނިހެން ތަކެތި ބަދަލުކުރުން
- ސީ އައުޓްފޯލް އެއް އެޅުން
- ސްވަ ޖެޓިން މެޝިނެއް ފޯރުކޮށްދިނުން
ޕްލޭނިން މިނިސްޓްރީގެ ފަރާތުން މި މަޝްރޫއު ފެނަކަ އާ ހަވާލުކޮށްފައިވަނީ 42.36 މިލިއަން ރުފިޔާ އަށް 180 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
