އަލަމްގީރުގެ ކޮޓަރީގައި ނަގާފައިވާ ވީޑިއޯތައް ބޭނުންކޮށްގެން ބްލެކްމެއިލް ކުރަމުން ދިޔަ މައްސަލަ އާއި ގުޅިގެން ހައްޔަރު ކުރި މީހުންގެ ވަނަވަރު ފުލުހުން ހާމަކޮށްފާއިރު، އެ މައްސަލައިގެ ތުހުމަތުގައި ހައްޔަރުކޮށްފައިވާ ތިން މީހުން ދޫކޮށްލައި ފުލުހުންވަނީ މައްސަލަ ފައިލްކޮށްފައެވެ.
މި މައްސަލައާ ގުޅިގެން އަބަރުގެ ދައުވާ އުފުލާފައިވާ ގާނޫނީ ވަކީލު މައުމޫން މޫސާވަނީ އަބުރު ގެއްލުމުގެ ބަދަލެއްގެ ގޮތުގައި ދިވެހި ފުލުހުންގެ ފަރާތުން 238.7 މިލިއަން ރުފިޔާ ނަގައި ދިނުމަށް އެދި ސިވިލް ކޯޓަށް މައްސަލަ ހުށަހަޅާފައިކަމަށް މައުލޫމާތު ލިބިފައިވެއެވެ.
ކުރިން ފުލުހުން ބުނެފައިވާ ގޮތުން މައުމޫނާ އެކު މި މައްސަލައިގައި ހައްޔަރު ކުރި މީހުން ދުކޮށްލައި މައްސަލަ ފައިލް ކުރީ ޕްރޮސިކިއުޓަރ ޖެނެރަލްގެ ލަފާގެ މަތިންނެވެ.
"ލިބިފައިވާ ހެއްކަކީ ޖިނާއީ ދައުވާއެއް ކުރެވޭވަރުގެ ބުރަދަނެއްހުރި ހެކިތަކެއް ނޫންކަމަށާއި، އެހެންކަމުން މައްސަލަ ފައިލް ކުރުމަށް ޕީޖީ އޮފީހުން ލަފާދީފައިވާތީ މި މައްސަލާގައި ހައްޔަރުކޮށްފައިވާ މީހުން 2022 ނޮވެމްބަރުތެރޭ ދޫކޮށްލައި މައްސަލަ ވަނީ ފައިލްކޮށްފައި،" ފުލުހުން އޭރު ބުންޏެވެ.
މައްސަލަ ފައިލްކޮށްފައި ވީނަމަވެސް، މި މައްސަލަ އާއި ގުޅިގެން އިތުރު މައުލޫމާތު ފުލުހުންނަށް ލިބިއްޖެނަމަ މައްސަލަ އަލުން ބެލުމުގެ ފުރުސަތު އެބައޮތްކަންވެސް ފުލުހުން އޭރު ފާހަގަކުރި އެވެ.
