ރައީސް ޔާމީންގެ ގާނޫނީ ވަކީލުންގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ޑރ. ޖަމީލު ވިދާޅުވީ، ރައީސް ޔާމީންނަށް އަންނަ ރިޔާސީ އިންތިހާބުގައި ކުރިމަތިލެވޭނެތޯ މިއީ ވަރަށް ގިނަ މީހުން ކުރާ ސުވާލެއް ކަމަށެވެ. އިސްތިއުނާފް ލަސްވަމުންދާތީ އެކަމުގެ ކަންބޮޑުވުންތައް ވެސް ފާޅުކުރަމުންދާ ކަމަށެވެ.
އެކަމަކު، އިސްތިއުނާފީ މަރުހަލާއަކީ މާ ދިގުދެމިގެންދާ މަރުހަލާއެއް ނޫންކަމުން، މިއަހަރުގެ މާޗު މަސްތެރޭ އެމަނިކުފާނު މިނިވަންވެ ވަޑައިގަންނަވާނެ ކަމަށް ޑރ. ޖަމީލު ވިދާޅުވި އެވެ. އަދި އިސްތިއުނާފީ މަރުހަލާއިން ކާމިޔާބު ލިބޭނީ ރައީސް ޔާމީން އަށް ކަމުގެ ޔަގީންކަން އެބައޮތް ކަމަށް ވިދާޅުވި އެވެ.
ވ.އާރަށު މައްސަލާގައި 11 އަހަރުގެ ޖަލު ހުކުމެއް ޔާމީންގެ މައްޗަށް އިއްވީ ޕީޕީއެމްގެ ރިޔާސީ ޓިކެޓު އެމަނިކުފާނާއި ހަވާލުކޮށް، ވަރުގަދަ ކެމްޕެއިންތަކެއް ކުރަމުން ދަނިކޮށް މިދިޔަ ޑިސެމްބަރު މަހުގެ 25 ވަނަ ދުވަހު އެވެ.
ހުކްމް އިސްތިއުނާފް ކުރުމުގެ މަސައްކަތް ޔާމީންގެ ވަކީލުންގެ ޓީމުން ކުރަމުންދާއިރު، އިސްތިއުނާފަށް ހުށަހެޅުމަށް ބަންދު ދުވަސްތަކާއި ނުލައި ގާނޫނުގައި ބުނާ 60 ދުވަސް ލިބޭނެ އެވެ. މިހާރު އޮތީ 48 ދުވަހުގެ މުއްދަތެކެވެ.
މާޗު ހިސާބުގައި ޔާމީން މިނިވަންވާނެ ކަމަށް އެމަނިކުފާނުގެ ވަކީލުންގެ ޓީމުން ވިދާޅުވިއިރު، މިފަހަރުގެ އިންތިހާބަށް ކެންޑިޑޭޓުންގެ ގޮތުގައި ކުރިމަތިލުމުގެ މުއްދަތު ހުޅުވާލާނީ 23 ޖުލައި އިން 13 އޮގަސްޓްގެ ނިޔަލަށެވެ. ކެންޑިޑޭޓުންގެ ނަންތައް ތަރުތީބުކޮށް އިއުލާންކުރުން އޮންނާނީ އޮގަސްޓު ނުވަ ވަނަ ދުވަހު އެވެ.
ރިޔާސީ އިންތިހާބު ބާއްވަން ނިންމާފައިވަނީ އަންނަ ސެޕްޓެމްބަރު މަހުގެ 9 ވަނަ ދުވަހު އެވެ. ދެވަނަ ބުރެއް ބާއްވަން ޖެހިއްޖެނަމަ ބާއްވާނީ އެމަހުގެ 30 ގައެވެ.
