ފުރަތަމަ ފަހަރަށް ވޯލްޑްކަޕްގެ ތަށި އުފުލާލުމުގެ ޝަރަފު މެސީ ހޯދި ފަހުން މަސް ދުވަސްވެގެން ދިޔައީއެވެ.
ވޯލްޑްކަޕް ކާމިޔާބު ކުރިތާ މަސް ދުވަސް ފަހުން، މެސީވަނީ މުބާރާތާ ގުޅޭ ބައެއް ވާހަކަތައް ދައްކާފައެވެ. މެސީގެ ވާހަކަތަކުގައި އެންމެ މުހިއްމު ކަމެއްގެ ގޮތުގައި ފާހަގަ ކުރީ ވޯލްޑްކަޕަށް ފަހު ހުރިހާ ކަމެއް ބަދަލުވެފައިވާ ވާހަކައެވެ.
ދުނިޔޭގެ އެންމެ މޮޅު ކުޅުންތެރިޔާގެ މަގާމް ހަތް ފަހަރު ހޯދާފައިވާ އުމުރުން 35 އަހަރުގެ މެސީ ވޯލްޑްކަޕާ ކުރިމަތިލީ ބާސެލޯނާއިން ފްރާންސްގެ ޕީއެސްޖީއަށް ބަދަލުވުމަށް ފަހުއެވެ.
ގިނަ ދުވަސްތަކެއް ވަންދެން ބާސެލޯނާގައި ކުޅުމަށް ފަހު ޕީއެސްޖީއަށް ބަދަލުވި މެސީ، ކެރިއަރު ނިންމާލާނީ ޕީއެސްޖީގައި ކަމަށް ކުރިން ބެލެވުނު ނަމަވެސް އެކަންވެސްވަނީ ވޯލްޑްކަޕާއެކު ބަދަލުވެފައެވެ.
އެކަމުގެ މައިގަނޑު ސަބަބަކީ ފުޓްބޯޅައިގައި މެސީ ދެން އިތުރަށް ސާބިތުކޮށްދޭން ޖެހޭ ކަމެއް، ހާސިލް ކުރަން ޖެހޭ ކަމެއް ނެތުމުންނެވެ. އަށް ވަނަ ފަހަރަށް ދުނިޔޭގެ އެންމެ މޮޅު ކުޅުންތެރިޔާގެ މަގާމް މެސީއަށް ލިބޭނެ ކަމާމެދުވެސް ޝައްކެއް ނެތެވެ.
ހުރިހާ ކަމެއް ބަދަލުވެއްޖެ ކަމަށް މެސީ ބުނި ބުނުން އެއްބަޔަކު މާނަކުރަނީ މެސީ އަލުން އެނބުރި ބާސެލޯނާއަށް ދިޔުމެވެ. އަނެއް ބަޔަކު ދެކޭ ގޮތުގައި ފުޓްބޯޅައިގައި މެސީ ދެން އިތުރަށް ހާސިލް ކުރަން ޖެހޭ އެއްވެސް ކަމެއް ނެތުމުން މެސީ ދެން ބަދަލުވާނީ ވާދަވެރި ރޮނާލްޑޯ ކުޅެމުން އަންނަ ސައުދީ ލީގަށެވެ. ސައުދީގެ އެމްބެސަޑަރެއްގެ ގޮތުގައި މިހާރުވެސް ހުރި މެސީއަށް ދުނިޔޭގެ އެންމެ ބޮޑު މުސާރަ ސައުދީން މިހާރުވެސްވަނީ ހުށަހަޅާފައެވެ. އެކަމަކު އެކަމާ ގުޅޭ ގޮތުން އަދި ވާހަކައެއް ނުދެކެވެ.
