ކުޑަގިރި ހުޅުވުމަށް ވަމުންދާ އެންމެފަހުގެ ތައްޔާރީތައް ބައްލަވާލެއްވުމަށް އެރަށަށް ވަޑައިގަތުމަށްފަހު ފައިސަލް ވިދާޅުވީ،
- ހަފުތާ ބަންދާއި ސަރުކާރު ބަންދު ދުވަސްތަކުގައި ކުޑަގިރިއަށް ހިލޭ ދަތުރު ކުރެވޭނެ ކަމަށާއި އެ ދުވަސްތަކުގައި ފެރީއަށް ވެސް އަދި ރަށަށް އެރުމަށް ވެސް އެއްވެސް އަގެއް ނުނަގާނެ ކަމަށް
- ބަންދު ނޫން ދުވަސްތަކުގައި އެ ރަށަށް ދަތުރުދާ ދިވެހިންނަށް ޓިކެޓް ވިއްކާނީ ކޮޅަކަށް 25 ރުފިޔާއަށް
- ބަންދު ނޫން ދުވަސްތަކުގައި ރަށަށް އެރުމަށް 'އެންޓްރެންސް ފީ' ގެ ގޮތުގައި 50 ރުފިޔާ ދައްކަން ޖެހޭ
- ބާރަ އަަހަރުން ދަށުގެ ކުދިންނަށް ދައްކަން ޖެހޭނީ މި އަގުތަކުގެ ދެބައިކުޅަ އެއްބައި
ބަންދު ދުވަސްތަކުގައި އެ ރަށް ބޭނުން ކުރެވޭނީ ދިވެހިންނަށް އެކަނި ކަމަށާއި ކުޑަކުދިންނާއި ހާއްސަ އެހީއަށް ބޭނުންވާ ފަރާތްތަކަށްވެސް ހިދުމަތް ލިބޭނެ ގޮތަށް އިންތިޒާމުތައް ހަމަޖައްސާފައިވާ ކަމަށް ނައިބު ރައީސް ވިދާޅުވިއެވެ.
މާލެ ސަރަހައްދުގައި ދިރިއުޅެމުންދާ ފަރާތްތަކުން ދަތުރު ދިއުމަށް ތަރައްގީކޮށްފައިވާ ކުޑަގިރިއަށް ހާއްސަ އެޕްލިކޭޝަނެއް އެޗްޑީސީގެ ފަރާތުން ވަނީ ތައްޔާރުކޮށްފައެވެ. އެ އެޕްލިކޭޝަން މެދުވެރިކޮށް ދަތުރު ދާން ޖާގަ އޮތް ދުވަސްތަކާއި ޖާގަ ހުރިވަރު ބަލާލެވުމުގެ އިތުރުން ދަތުރު ދިއުމަށް ބުކް ކުރެވެއެވެ.
މާލެއިން ފުރައިގެން ގާތްގަނޑަކަށް 15 ވަރަކަށް މިނެޓުން ދެވޭހާ ކައިރި ހިސާބެއްގައި އޮތް ކުޑަގިރި ފަޅުން އަށް ހެކްޓަރު ބިން ހިއްކައިގެން ތަރައްގީ ކުރެވުނު މި ރަށުގައި ދަތުރުދާ ފަރާތްތަކަށް ބޭނުންވާނެ ގިނަ ވަސީލަތްތަކެއް ވަނީ ގާއިމުކޮށްފައެވެ.
