ރާއްޖޭގެ ފަތުރުވެރިކަމަށް ދިމާވެފައިވާ އެންމެ ބޮޑު މައްސަލައަކީ އަލަށް ކުއްޔަށް ދޭ ރަށްތައް ވެސް "ގަލުގައި އަޅާތީ" ކަމަށް ރައްޔިތުންގެ މަޖިލީހުގެ ރައީސް މުހަދު ނަޝީދު މިއަދު ރައްޔިތުންގެ މަޖިލީހުގައި ވިދާޅުވެއްޖެއެވެ.
Advertisement
ރައްޔިތުންގެ މަޖިލީހުގައި ޓޫރިޒަމް މިނިސްޓަރު ޑރ. މައުސޫމް ދެއްކެވި ވާހަކަފުޅަކަށް ރައްދުދެއްވައި، ރިޔާސަތުގައި އިންނަވައި ރައީސް މުހައްމަދު ނަޝީދު ވިދާޅުވީ ކުރިން ދިން އުސޫލުގެ ދަށުން ދިވެހިރާއްޖޭގެ ރަށްތައް ޓޫރިޒަމްއަށް ކުށްޔަށް ދޭނަމަ، އައު ރަށްތައް ވެސް "ގަލުގާ އަޅާނެ" ކަމަށެވެ.
ޓޫރިޒަމް މިނިސްޓަރު ޑރ. އަބްދުﷲ މައުސޫމް
ރައީސް ނަޝީދު މިހެން ވިދާޅުވީ ކުރެންދޫ ދާއިރާގެ މެންބަރު އަބްދުލް ގަނީ އަބްދުލްހަކީން ކުރެއްވި ސުވާލަކަށް ޖަވާބު ދެއްވަމުން "ޅ އަތޮޅުން ނުހެދި ހުރި ރަށްރަށް ހުރީތީވެ އާ ރަށްރަށް ދެމުން މިދަނީ. އަޅުގަނޑު ކުރިން ދެންނެވިން ގަލުގަ އަޅާފަހުރި ކަންތައްތައް ބަހައްޓާފަ އާތަންތަނާ އެއްކޮށް ކުރިއަށް ދާން ޅ އަތޮޅުންވެސް އިތުރު ތަންތަން ދެމުން މިގެންދަނީކަމަށް،" މިނިސްޓަރު ވިދާޅުވުމުންނެވެ.
ޑރ. މައުސޫމްގެ ވާހަކައަށް ރައްދުދެއްވަމުން ރައީސް ނަޝީދު ވިދާޅުވީ، ރާއްޖޭގައި ފަތުރުވެރިކަމަށް 100 އާ ގާތްކުރާ މިންވަރަށް ރަށް ދެވިފައި ނުހެދި އެބަހުރި ކަމަށެވެ. 1997 ވަނަ އަހަރުން ފެށިގެން މި މައްސަލަ ދިމާވާކަމަށް ވެސް އެމަނިކުފާނު ވިދާޅުވިއެވެ.
"މައްސަލައަކީ އާ ތަންތަން ވެސް ގަލުގާ އަޅާތީ. އެ ކަންކަމަށް ޖުމްލަ ހައްލެއް ގެނައުމަށް އިއްޒަތްތެރި މަޖިލީހުގެ ދައުރު ކުޑައެއް ނޫން. ސަރުކާރުން އޭގައި އަދާކުރަންޖެހޭ ވާޖިބު ވެސް ކުޑައެއް ނޫން. އަޅުގަނޑަށް ފެންނަ ގޮތުގައި މިއޮތް އުސޫލުން އަނެއްކާވެސް ރަށްތައް ދޫކުރަމުން ދިޔާމާ ކުރީގާ ގަލުގައި އެޅި ސަބަބުތަކަށްޓަކައި އަލުން ގަލުގާއެޅުން އެއީ ވަރަށް އެކަށީގެންވާކަމެއް،" ރައީސް ނަޝީދު ވިދާޅުވިއެވެ.
މިނިސްޓާ މައުސޫމް ވިދާޅުވީ ޓޫރިޒަމްގެ ބޭނުމަށް ދޫކޮށްފައިވާ އަދި ހުއްޓިފައިވާ ރަށްތައް އަލުން ފެށުމަށް މިނިސްޓްރީން "ފަހި" ކޮށްދިނުމަށް ވަރަށް ގިނަ ކަންތައްތަކެއް ކޮށްދެމުން ގެންދާކަމަށެވެ. އަދި ސަރުކާރުން ވިޔަފާރީގެ ތެރެއަށް ނުވަންނާނެކަމަށާއި، ވިޔަފާރި ކުރަމުން ގެންދަނީ އަމިއްލަ ފަރުދުންކަމަށެވެ.
