މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ސަރުކާރުގެ ތަރުޖަމާނު މިއުވާން މުހައްމަދު ވިދާޅުވީ ތިލަފުށިން ބިން ދިނުމުގެ މައްސަލާގައި ބައެއް ވިޔަފާރިވެރިން ރައީސް އިބްރާހިމް މުހައްމަދު ސޯލިހުއާއި ބައްދަލުކުރެއްވިކަމަށާއި މި ބައްދަލުވުމުގައި އެބޭފުޅުންގެ ހުރި ބައެއް ކަންބޮޑުވުންތައް ފާހަގަކުރެއްވި ކަމަށެވެ.
އެބޭފުޅުންގެ ކަންބޮޑުވުމަކީވެސް އާއްމު ވިޔަފާރިތަކަށް ވަނުމުގެ ދޮރު ބިދޭސީންނަށް ހުޅުވިގެން ދިއުންކަމަށާއި ނަމަވެސް ރައީސް ސޯލިހް ވިޔަފާރުވެރިންނަށް ދެއްވި ޔަގީންކަމަކީ ދިވެހި ވިޔަފާރިވެރިންނަށް ގެއްލުވްވާގޮތަށް ސަރުކާރުގެ އެއްވެސް އުސޫލެއް ނޯންނާނެކަން ކަމަށް މިއުވާން ވިދާޅުވިއެވެ.
ތިލަފުށިން ބިން ދިނުމުގެ ކަންކަން ކުރިއަށްދާނީ ދިވެހި ވިޔަފާރިވެރިންނަށް ގެއްލުމެއް ނުލިބޭގޮތަށް ކަމުގެ ޔަގީންކަން ވިޔަފާރިވެރިންނަށް ރައީސް ދެއްވިކަމަށް މިއުވާން ވިދާޅުވިއެވެ.
މިއުވާން ވިދާޅުވީ އާއްމު ވިޔަފާރިތަކަށް ވަނުމުގެ ފުރުސަތު ބިދޭސީންނަށް ނުދިން ނަމަވެސް ރާއްޖޭގައި ބޮޑެތި އިންވެސްޓްތައް ކޮށްގެން ތިބި، ބޭރުގެ އިންވެސްޓަރުންނަށް އެމީހުންގެ މުދާ ގުދަންކުރުންފަދަ ކަންކަމަށް ބިން ބޭނުންވާ ކަމަށެވެ.
މިއުވާން ވިދާޅުވީ ސަރުކާރުން ފުރުސަތު ހުޅުވާލާފައިވަނީ ރާއްޖޭގައި އިންވެސްޓްކޮށްގެން ތިބި ބޭރުގެ ވިޔަފާރިވެރިންގެ މުދާ ގުދަންކުރުންފަދަ ކަންކަމަށް ކަމަށެވެ. ނަމަވެސް އެކަން ކުރިއަށްގެންދާނީ ދިވެހި ވިޔަފާރިތަކަށް ގެއްލުން ނުވާގޮތަށްކަމަށާއި ތިލަފުށިން ދިނުމަށް ނިންމާފައިވާ ބިމުގެ 90 އިންސައްތަ ހާއްސަކުރަނީވެސް ދިވެހި ވިޔަފާރިތަކަށްކަމަށް މިއުވާން ވިދާޅުވިއެވެ.
ތިލަފުށީ ސިނާއީ ސަރަހައްދުން ވިޔަފާރިތަކަށް ބިން ވިއްކުމަށް ހުޅުވާލިއިރު، 99 އަހަރަށް ބޭރުގެ ފަރާތްތަކަށް ދިނުމަށް ނިންމުމުން ސަރުކާރަށް ވަނީ ވަރަށް ބޮޑަށް ފާޑުކިއުން އަމާޒުވެފައެވެ. އަދި އެނިންމުން ބަދަލުކުރުމަށް ސަރުކާރަށް އަންނަނީ ގޮވާލަމުންނެވެ.
