އަންނަ ސެޕްޓެމްބަރު މަހު އޮންނަ ރިޔާސީ އިންތިހާބަށް ތައްޔާރުވުމުގެ ގޮތުން، އެމްޑީޕީގެ ފަރާތުން ކޯލިޝަން ހެދުމާއި އެކަމަށް މަޝްވަރާ ކުރުމުގެ ބާރު އެޕާޓީގެ ގައުމީ މަޖިލީހުން މިދިޔަ ހަފްތާގައިވަނީ ރައީސް ސޯލިހަށް ދެއްވާފައެވެ.
އެނގިފައިވާ ގޮތުގައި ރައީސް ސޯލިހް މިއަދު ކޯލިޝަން ޕާޓީތަކަށް ސިޓީފުޅެއް ފޮނުއްވީ ރިޔާސީ އިންތިހާބަށް ކޯލިޝަން ހެދުމުގެ މަޝްވަރާތަކަށް ޖާގަ ހޯއްދެވުމަށެވެ. ނަމަވެސް އެކަމުގެ ތަފްސީލެއް އަދި ސާފެއް ނުވެއެވެ.
ރައީސް ސޯލިހްގެ ސިޓީފުޅާއި ގުޅިގެން ބައެއް ޕާޓީތަކުން ގޮތެއް ނިންމުމަށް ޕާޓީގެ ތެރޭގައި މިހާރު މަޝްވަރާކުރަމުން ދާކަމަށް މައުލޫމާތު ލިބެއެވެ.
ރައީސް ސޯލިހްގެ ފަރާތްޕުޅުން ކޯލިޝަން ޕާޓީތަކަށް ސިޓީފުޅެއް ފޮނުއްވިއިރު، ކޯލިޝަންގައި ދެވަނައަށް އެންމެ ބޮޑު ޕާޓީ، ޖުމްހޫރީޕާޓީގެ ލީޑަރު ގާސިމް އިބްރާހީމްގެ އަރިހަށް ރައީސް ސޯލިހްގެ ފަރާތްޕުޅުން އިއްޔެވަނީ ޓީމެއް ވަޑައިގެން މަޝްވަރާ ކުރައްވާފައެވެ.
އިއްޔެ ސަން އައިލެންޑް ރިސޯޓްގައި ކުރިއަށް ދިޔަ އެ މަޝްވަރާތަކާއި ގުޅޭ ތަފްސީލެއްވެސް މިހާތަނަށް ސާފެއް ނުވެއެވެ.
