އެޗްޑީސީންް ނެރުނު ނޫސް ބަޔާނެއްގައި ބުނެފައިވަނީ، ތިލަފުށިން ހިއްކުމަށް ނިންމާފައިވާ ސަރަހައްދުން ބިން ގަތުމަށް ބީލަމުގައި ބައިވެރިވެވޭނީ ހަަމަައެކަނި އެފްޑީއައި ޕޮލިސީގެ ދަށުން އެ ފަރާތްތަކުން ކުރަމުން އަންނަ އަދި ކުރަން ގަސްތުކުރާ ވިޔަފާރިތަކަށް ކަމަށެވެ.
އެ ވިޔަފާރިތައް ވާންޖެހޭނީ ހުއްދަ އޮތް ވިޔަފާރިތަކަކަށް ކަމަށާއި އަދި އެކަމަށް އެދޭ ކުންފުނިތަކަކީ ރާއްޖޭގައި ރަޖިސްޓްރީކޮށްފައިވާ ކުންފުނިތަކަށް ވާން ޖެހޭނެ ކަމަށް އެ ބަޔާނުގައިވެއެވެ. ބަޔާނުގައި ވަނީ ޕްރޮޖެކްޓް ބޭސިސްގައި ކޮންސްޓްރަކްޝަން މަޝްރޫއުތައް ހިންގުމަށް ހުއްދަ ދެވިފައިވާ ކުންފުނިތަކަށް ބީލަމުގައި ބައިވެރި ނުވެވޭނެ ކަމަށެވެ.
ބިން ކުއްޔަށް ނެގުމަށް ހުށަހަޅާ ބޭރުގެ ކުންފުނިތަކުން ބިން ބޭނުންކުރުމަށް ހުށަހަޅާފައިވާ އިންޑަސްޓްރިއަލް ބޭނުންތަކަކީ އެ ފަރާތްތަކަށް އެފްޑީއައި ޕޮލިސީގެ ދަށުން ހުއްދަ ދެވިފައިވާ ވިޔަފާރި ބޭނުންތަކެއްތޯ އިކޮނޮމިކް މިނިސްޓްރީ އާއެކު މަސައްކަތްކޮށްގެން، ބީލަމުގެ ޕްރޮސެސްގެ ބައެއް ގޮތުގައި ބެލޭނެ ކަމަށް އެޗްޑީސީގެ ބަޔާނުގައި ބުނެފައިވެއެވެ.
އެ ބަޔާނުގައި ބުނެފައިވާ ގޮތުގައި ތިލަފުށިން ބިން ދޫކުރުމަށް ކުރަމުން ގެންދާ މަސައްކަތަކީ ރާއްޖޭގައި ސިނާއީ މަސައްކަތްތައް ކުރުމަށް ހުރި ދަތިތަކަށް ހައްލެއް ހޯދައިދިނުމުގެ ގޮތުންނާއި އެކަމުގެ ތެރެއިން އިގުތިސޯދީ އާ މަސައްކަތަކަށް ޖާގަ ހޯދައިދިނުމަށް ކުރެވޭ މަސައްކަތެއް ކަމުގައެވެ.
އިގުތިސޯދީ ގޮތުން ހުޅުވޭ އެފަދަ ކަންކަމުން އިތުރު ވަޒީފާ އުފެދި، ވިޔަފާރިތަކުން ރައްޔިތުންނަށް ފޯރުކޮށްދޭ އެކިއެކި ހިދުމަތްތަކަށް ރަނގަޅު ބަދަލުތަކެއް އަންނާނެ ކަމަށް ގަބޫލުކުރެވޭ ކަމަށް އެ ބަޔާނުގައި އެޗްޑީސީން ބުނެފައިވެއެވެ.
އެޗްޑީސީން ބޭރުގެ ފަރާތްތަކަށް 99 އަހަރަށް ބިން ކުއްޔަށް ދޫކުރުމަށް ނިންމުމާ ގުޅިގެން، ބައެއް ސިޔާސީ ޕާޓީތަކުންނާއި ވިޔަފާރިވެރިން ވަނީ ކަންބޮޑުވުން ފާޅުކޮށްފައެވެ.
އެ ކަމުގައި ވިޔަފާރިވެރިންގެ ހުރި ކަންބޮޑުވުންތަކާ އެކު، ރައީސް ސޯލިހާ ވެސް ބައްދަލުކޮށްފައެވެ. އެ ބައްދަލުވުމަށް ފަހު، މަސީން ބުނެފައިވަނީ، ތިލަފުށިން ބިން ވިއްކާ އުސޫލު ދިވެހި ވިޔަފާރިތަކަށް ގެއްލުން ނުވާނެހެން އިސްލާހުކޮށްދެއްވާނެކަމުގެ ޔަގީންކަން ރައީސް ސޯލިހު ދެއްވާފައިވާ ކަމަށެވެ.
ސަރުކާރުގެ ފަރާތުން ތިލަފުށި ތަރައްގީ ކުރުމަށް އެކުލަވާލި މާސްޓަ ޕްލޭނުގައިވާ ގޮތުން އިތުރު 150 ހެކްޓަރުގެ ބިން ހިއްކުމަށް ނިންމާފައިވާއިރު، އެ ބިމުގެ ތެރެއިން 4.3 ހެކްޓަރު (ވަކި 50 ޕްލޮޓެއްގެ ގޮތުގައި) ބީލަމުގެ އުސޫލުން ދޫކުރުމަށް އެޗްޑީސީން އިއުލާނުކުރީ މި މަހުގެ ހަތްވަނަ ދުވަހުއެވެ.
