ކުށްކުރާ ބިދޭސީން ރާއްޖެއިން ފޮނުވާލާ މައްސަލާގައި އުފެދިފައިވާ ކަންބޮޑުވުންތަކަށް ޖަވާބުދާރީވަމުން މިއަދު ބޭއްވި ނޫސްވެރިންގެ ބައްދަލުވުމުގައި ޝަމީމް ވިދާޅުވީ، ރާއްޖޭގައި ހުރުމަކީ ބިދޭސީއަކަށް ލިބޭ ހަށްގެއް ނޫން ކަމަށާއި ދިވެހި ރާއްޖޭގައި ހުުރުމުގެ ހައްގު ލިބޭނީ ދިިވެހީންނަށް އެކަނި ކަމަށެވެ.
ބިދޭސީންނަށް ރާއްޖޭގައި ހުރުމަށް ދެނީ ހުއްދައެއް ކަން ފާހަގަކުރައްވާ ޝަމީމް ވިދާޅުވީ، އެ ހުއްދަ ދެނީ އިމިގްރޭޝަން ކޮންޓްރޯލަރު ކަމަށެވެ. އިމިގްރޭޝަނުގެ ކޮންޓްރޯލަރު ވަކި ބިދޭސީއަކު ރާއްޖެއަށް އަރުވަން ބޭނުންނުވާނަމަ އެ ހުއްދަ ނުލިބޭނެކަން ޕީޖީ ފާހަގަކުރެއްވި އެވެ.
ޝަމީމް ވިދާޅުވީ ކުށްކުރާ މީހަކަށް އަދަބު ދެނީ ތިން މަގުސަދެއް ހާސިލު ކުރުމުގެ ބޭނުމުގައި ކަމަށެވެ. އެއީ:
- އެމީހަކު ރިހިބިލިޓޭޓު ކުރުން
- މުޖުތަމައު ސަލާމަތްކުރުން
- ކުށްކުރުމުން އަދަބު ލިބޭނެކަން އަންގައިދިނުން
ބިދޭސީއަކު ޖަލުގައި ބަހައްޓައިގެން އެ ތިން ކަންތަކުގެ ތެރެއިން ދެ މަގުސަދެއް ހާސިލު ނުވާ ކަމަށް ޝަމީމް ވިދާޅުވި އެވެ. އެހެންކަމުން އަދަބު ދިނުމުގެ މުޅި ފިލޯސަފީއަށް ބަލާއިރުވެސް އެއީ މާ ހަމަޖެހޭ ކަމަކަށް ބައެއް ފަހަރުނުވާކަން ޝަމީމް ފާހަގަކުރެއްވި އެވެ.
ޝަމީމް ވިދާޅުވީ، ބިދޭސީން އަތުން އަތުލައިގަނެވޭ ބައެއް މަސްތުވާތަކެއްޗަކީ ޓްރާންސިޓް ފަސިންޖަރުން އަތުން އަތުލައިގަނެވޭ ތަކެތި ކަމަށެވެ. އެއީ އެހެން ގައުމަކަށް އެތެރެކުރަން އޭނާ ގެންނައި މަސްތުވާތަކެތި ކަމުން އެ މައްސަލަގައި އޭނާ ހައްޔަރުކޮށް މައްސަލަ ބަލައި ތަހުގީގު ކުރުމުގެ ވިސްނުން ޕީޖީގައި ނެތްކަމަށް ޝަމީމް ވިދާޅުވި އެވެ.
އެހެންވީމައި އެ ފަދަ ބިދޭސީން ރާއްޖެއިން ފޮނުވާލުމަކީ މާބޮޑު މައްސަލައެއް ކަަމަށް ނުދެކޭ ކަމަށް ޝަމީމް ވިދާޅުވި އެވެ. އެކަމަކު ދިވެއްސަކާއި ގުޅިގެން ރާއްޖެއަށް މަސްތުވާތަކެތި އެތެރެކުރާނަމަ އެމައްސަލަ ބަލާ އަޅަންޖެހޭ ފިޔަވަޅުތަށް އަޅާނެ ކަމަށް ވިދާޅުވި އެވެ.
މަސްތުވާތަކެތި އެތެރެކުރާ މައްސަލަތަކުގައި ހިމެނޭ ބިދޭސީން ޑީޕޯޓުކޮށްލާތީ އެ ކަންބޮޑުވުންތައް ދިވެހީންގެ އޮވެއެވެ. އެގޮތުން މިފަހުން ވީއައިއޭ ތެރެއިން މަސްތުވާތަކެއްޗާއިއެކު ލަގެޖެއް ގެއްލުނު މައްސަލާގައިވެސް އެމީހާ ފަހުން ދޫކޮށްލުމުން ފާޑުކިޔުންތައް އަމާޒުވި އެވެ. އަދި ކުޑަކުއްޖަކާ ބެހުނު އިންޑިއާ މީހަކު ފޮނުވާލައިގެންވެސް މައްސަލަތައް ބޮޑުވި އެވެ. އިމިގްރޭޝަނުން އޭނާ ފޮނުވާލާފައިވަނީ އޭނާގެ މައްސަލަ ކޯޓުގައި އޮއްވާ ކަމަށް ފަހުން ޕީޖީން ބުނެފައި ވެއެވެ. އެކަމަކު އިމިގްރޭޝަނުން ބުނަނީ އިސްތިއުނާފު ކުރާކަން އެ އިދާރާއަށް ނާންގާ ކަމަށެވެ.
