ދައުލަތުގެ މީޑިއާއަށް މައުލޫމާތު ދެއްވަމުން ޝާހު ވިދާޅުވެފައިވަނީ ޕީއެސްއައިޕީ 20 ރަށުގެ މަސައްކަތް ކުރިއަށް އޮތް ތިން މަސް ދުވަހުގެ ތެރޭގައި މުޅިން ނިންމާ ހަވާލުކުރުމަށް އުންމީދު ކުރައްވާ ކަަމަށެވެ. އެ ކުންފުންޏާ ހަވާލުކުރެވިގެން ކުރިއަށްދާ ހުރިހާ މަޝްރޫއުތަކެއްގެ މަސައްކަތްވެސް ބާރު ސްޕީޑުގައި ކުރިއަށްދާ ކަމަށާއި ފަސް ރަށުގެ މަސައްކަތް މުޅިން ނިމި ހިދުމަތް ދޭން ފަށާފައިވާ ކަމަށް ޝާހު ވިދާޅުވިއެވެ.
ރާއްޖޭގެ ހުރިހާ ރަށެއްގައި ރައްކާތެރި ފެނާއި ނަރުދަމާގެ ނިޒާމު ގާއިމުކުރުމަށް ސަރުކާރުން ފެށި މަސައްކަތުގެ ދަށުން 20 މަޝްރޫއެއްގެ މަސައްކަތް ކުރުމަށް އެމްޑަބްލިއުއެސްސީ އާ ހަވާލުކޮށްފައިވަނީ 2020 ވަނަ އަހަރުގެ ނޮވެމްބަރު މަހުގައެވެ.
އެ މަޝްރޫއުތަކުގެ އިތުރުން އޯޕެކް ފަންޑް ފޯ އިންޓަނޭޝަނަލް ޑިވެލޮޕްމަންޓް (އޮފިޑް) ގެ ދަށުން ހަަތަރު ރަށެއްގައި ފެނާއި ނަރުދަމާގެ ނިޒާމް ގާއިމުކުރުމުގެ މަސައްކަތް ވެސް އެ ކުންފުނިން ދަނީ ކުރަމުންނެވެ.
ނ. ފޮޮއްދޫގައި ފެނާއި ނަރުދަމާގެ ނިޒާމު ގާއިމުކުރުމުގެ މަސައްކަތް އެމްޑަބްލިއުއެސްސީން ދަނީ ކުރަމުން - ފޮޓޯ:އެމްޑަބްލިއުއެސްސީ
އެމްޑަބްލިއުއެސްސީގެ މަޝްރޫއުތައް ހިނގަމުންދާ 20 ރަށުގެ ތެރެއިން 15 ރަށުގައި ކުރަމުންދަނީ ފެނުގެ ނިޒާމު ގާއިމު ކުރުމުގެ މަސައްކަތެވެ. ފަސް ރަށުގައި ކުރަނީ ނަރުދަމާ އެޅުމުގެ މަސައްކަތެވެ.
މި މަޝްރޫއުތަކުގެ އިތުރުން ޅ. ނައިފަރާއި ތ. ވޭމަންޑޫގެ ފެނާއި ނަރުދަމާގެ މަސައްކަތް ހުއްޓިފައިވަނިކޮށް، އެމްޑަބްލިއުއެސްސީން އެ ދެ މަޝްރޫއުގެ މަސައްކަތް ކުރިއަށް ގެންގޮސް ނިންމާފައިވާ ކަމަށް ޝާހު ވިދާޅުވިއެވެ.
