އެޗްއާރުސީއެމުން ބުނެފައިވަނީ ޖޭއެމްސީގެ ބިދޭސީ މަސައްކަތްތެރިން ހަޅުތާލު ކުރުމާ ގުޅިގެން އެ މަސައްކަތްތެރިންގެ އެކޮމޮޑޭޝަން ބްލޮކްއަށް އެ ކޮމިޝަނުގެ ރެޕިޑް ރެސްޕޮންސް ޓީމުން ރޭގެ ވަގުތެއްގައި ޒިޔާރަތްކޮށްފައިވާ ކަަމަށާއި ބިދޭސީ މަސައްކަތްތެރިންގެ ހުރި ޝަކުވާތައް އެ ކޮމިޝަނުން ބަލަމުން ދާ ކަަމަށެެވެ.
މައުލޫމާތު ލިބޭގޮތުން ޖޭއެމްސީގެ މަސައްކަތްތެރިންނަށް މުސާރަ ނުދީގެން އެފަރާތްތަކުން ހަޅުތާލު ކުރަމުންދާތާ ތިން ދުވަސް ވެއްޖެއެވެ. މުސާރަ ނުދިނުމުގެ އިތުރުން ދުވާލަކު 12 ގަޑިއިރު މަސައްކަތް ކުރުވުމާއި ކެއިންބުއިމަށް ދޭ ތަކެތީގެ ފެންވަރު ދަށްވުމަކީ ވެސް އެ ފަރާތްތަކުން ހަޅުތާލު ކުރަމުންދާ ސަބަބުތަކެއް ކަމުގައިވެއެވެ.
އެ ކަންކަމުގެ އިތުރުން ބަލިވުމުން ސަލާމުގެ ޗުއްޓީ ނުދިނުމުގެ ޝަކުވާވެސް އެ ފަރާތްތަކުން ކުރަމުންދާކަމަށް މައުލޫމާތު ލިބެއެވެ.
މީގެކުރިންވެސް މުސާރަ ނުދީގެން ޖޭއެމްސީ މަސައްކަތްތެރިން ހަޅުތާލުކޮށްފައިވާއިރު، އައްޑޫގެ މަގުތައް ހެދުމުގެ މަޝްރޫއުގެ މަސައްކަތް ކުރުމަށް އެފްކޮންސްއިން ގެނައި މަސައްކަތްތެރިންވެސް މުސާރަ ނުދޭތީ އާއި ކާން ރަނގަޅަށް ނުލިބޭތީ ހަޅުތާލުކޮށްފައިވެއެވެ.
