ސްޓެލްކޯއިން ބުނި ގޮތުގައި ރާއްޖޭގެ ސިއްހީ ދާއިރާއަށް 75 އަހަރު ފުރުމާއި ދުނިޔޭގެ ސިއްހަތު ދުވަސް ފާހަގަ ކުރުމަށްޓަކައި ދިއްދޫ ހެލްތު ސެންޓަރުގެ އެދުމުގެ މަތިން އެ ސެންޓަރު ދިއްލާލުމަށް އެ ރަށު އިންޖީނުގޭގެ މުވައްޒަފުން އެހީތެރިކަން ފޯރުކޮށްދީފައިވާ ކަމުގައެވެ.
ސްޓެލްކޯގެ މުވައްޒަފުން ދިއްދޫ ހެލްތު ސެންޓަރު ދިއްލާލުމަށް އެހީތެރިކަން ފޯރުކޮށްދީފައިވާއިރު، ދުނިޔޭގެ ސިއްހަތު ދުވަހާ ގުޅިގެން ސްޓެލްކޯއިން ވަނީ އެ ކުންފުނީގެ އިންޖީނުގެތައް ދިއްލާލައިފައެވެ.
ސްޓެލްކޯއިން ބުނެފައިވަނީ ދުނިޔޭގެ ސިއްހަތު ޖަމުއިއްޔާއަށާއި ރާއްޖޭގެ ސިއްހީ ދާއިރާއަށް 75 އަހަރު ފުރުމާއި ދުނިޔޭގެ ސިއްހަތު ދުވަސް ފާހަގަ ކުރުމަށްޓަކައި، އެ ކުންފުނީގެ މާލެ އާއި ހުޅުމާލޭގެ އިތުރުން ވިލިމާލޭގެ އިންޖީނުގެ ދިއްލާލާފައިވާ ކަމަށެވެ.
ދުނިޔޭގެ ސިއްހަތު ދުވަސް ފާހަގަ ކުރުމަށް އދ. ދިއްދޫ ހެލްތު ސެންޓަރު ދިއްލާލުމަށް ސްޓެލްކޯގެ ފަރާތުން ވަނީ އެހީތެރިކަން ފޯރުކޮށްދީފައި - ފޮޓޯ:ސްޓެލްކޯ
ސިއްހަތުގެ ދުވަހާ ގުޅިގެން ސްޓެލްކޯއިން ބުނީ ސިއްހީ ދާއިރާގެ އެންމެހާ މަސައްކަތްތެރީންގެ ބުރަ މަސައްކަތްތައް ޝުކުރުވެރިކަމާ އެކު ބަލައިގަންނަން ޖެހޭ ކަމަށެވެ.
ކޮންމެ އަަހަރެއްގެވެސް އެޕްރީލް މަހުގެ ހަތްވަނަ ދުވަސް ފާހަގަކުރަނީ ދުނިޔޭގެ ސިއްހަތު ދުވަހުގެ ގޮތުގައެވެ. މި އަހަރުގެ ސިއްހަތު ދުވަހަށް، ދުނިޔޭގެ ސިއްހަތު ޖަމުއިއްޔާއިން ކަނޑައަޅާފައިވާ ޝިއާރަކީ ހެލްތު ފޯ އޯލް ނުވަތަ 'ސިއްހަތު އެންމެނަށް' ށެވެ.
