ލ.ގަމުން ޑީސަލް ހުސްވެ، އެރަށުން އިއްޔެ ކަރަންޓް ކެނޑުނު މައްސަލާގައި އަމްރު ކުރެއްވި ޓްވިޓެއްގައި ވިދާޅުވީ އެއްވެސް ރަށަކުން ޑީސަލް ހުސްވެގެން ކަރަންޓް ކެނޑެންޖެހޭފަދަ ހާލަތަކަށް ދުވަހަކުވެސް ރާއްޖެ ގޮސްފައިނުވާކަމަށާއި، ފެނަކައިގެ ހިންގުން ވަނީ ދޯދިޔާވެ، ވަރަށް ބޮޑަށް ބޮއްސުންލާފައި ކަމަށްވެސް އަމްރު ވިދާޅުވިއެވެ.
އަދި މިހާރުގެ ހާލަތު ހުރިގޮތަށް ބަލާއިރު، ފެނަކައިގެ ހުރިހާ އެސެޓެއް ވިއްކިޔަސް، އެކުންފުނީގެ ދަރަނި ނުދެއްކޭވަރަށް ދަރާފަވާ ކަމަށާއި، މިމައްސަލައަށް އެއްވެސް ހައްލެއް އެއްވެސް މުއައްސަސާއަކުންވެސް ލިބިފައިނުވާކަމަށްވެސް އަމްރު ވިދާޅުވިއެއެވެ.
ގަމުން އިއްޔެ ކަރަންޓް ކެނޑުނު މައްސަލާގައި ގަމު ފެނަކަ މެނޭޖަރު ފާރޫގް ހުސައިން އިއްޔެވަނީ ސަސްޕެންޑްކޮށްފައެވެ. އޭނާ ސަސްޕެންޑްކުރީ ގަމުން ޑީސަލް ހުސްވިއިރުވެސް ފެނަކައަށް ޑީސަލް ނުހޯދުމާއި ތެޔޮ ހުސްވީ މެނޭޖަރުގެ ޒިންމާ ނުނެގުމުން ކަމަށްވާތީ އެވެ.
ގަމަށް އިއްޔެ ކަރަންޓްދިނީ އެސަރަހައްދުގައި އޮފް އެފްއެސްއެމްގެ ތެޔޮ ބޯޓަކުން ފަހުން ތެޔޮ ގަނެގެންނެވެ. ތެޔޮ ހުސްވެ ގަމުން އިއްޔެ ގަޑިއެއްހާއިރަށް ކަރަންޓް ކެނޑުނެވެ.
