ޕްރެޒިޑެންޓްސް ކަޕުގެ ފުރަތަމަ މެޗުގައި މާޒިޔާއިން ރޭވަނީ ޓީސީ ބަލިކޮށްފައެވެ. މާޒިޔާއާ ޓީސީގެ މެޗުން މާޒިޔާ ރޭ މޮޅުވީ ދެ ލަނޑު ސުން ލަނޑުންނެވެ. ޓީސީ ބަލިކުރުމަށް ފަހު ނޫސްވެރިންނާ ވާހަކަ ދައްކަމުން މާޒިޔާގެ ކޯޗު އިވާން ބުނީ، ޓީސީން އުޅުނީ ބޯޅަ ކުޅެން ނޫން ކަމަށެވެ. އިވާން ފާހަގަ ކުރީ އެކިއެކި ސަބަބުތަކާ ހުރެ މެޗު ލަސްވެގެން ދިޔަ ކަންކަމުގެ ވާހަކައެވެ.
މައުލޫމާތު ލިބިފައިވާ ގޮތުގައި ޓީސީ ރޭގެ މެޗު ކުޅުނީ އެންމެ ތިން ޕްރެކްޓިހަށް ފަހުއެވެ. ރަނގަޅު ޕްރީސީޒަނެއް ހަދާފައި ނުވާތީ އެ ޓީމުގެ ގިނަ ކުޅުންތެރިންގެ މެޗު ފިޓްނަސް މައްސަލަ ރޭގެ މެޗުން ފާހަގަ ވިއެވެ.
ހޯމަ ދުވަހުގެ ރޭ ކުޅުނު މި މެޗުގައި މާޒިޔާއިން ޖެހި ދެ ލަނޑުވެސް ޖެހީ އެ ޓީމުގެ އިބްރާހިމް އައިސަމްއެވެ. އައިސަމްއަކީ ކުރިން ޓީސީއަށް ކުޅުނު ކުޅުންތެރިއެކެވެ. މިއީ މާޒިޔާގެ މި ސީޒަންގެ ދެވަނަ މޮޅެވެ. މާޒިޔާވަނީ ސީޒަން ހުޅުވަން ކުޅުނު މެޗުގައި އީގަލްސް އަތުން މޮޅުވެފައެވެ.
