ހުޅުމާލޭ ކޯސްޓްގާޑް ބަނދަރުގައި އޮތް ރައްމިއްޔާތުގައި އުޅަނދުގައި ނެގުމަށް ދިވެހި ގައުމީ ދިދަ، ކޮމާންޑިން އޮފިސަރަށް ހަވާލުކޮށް ދެއްވައި، އުޅަނދުގެ ނަންބޯޑު ރައީސް ކަޝްފުކޮށްދެއްވި އެވެ.
މި އުޅަނދުގެ ނަމަކީ "ސީ.ޖީ.އެސް ހުރަވީ"އެވެ. މިއަދު ހިދުމަތަށް ނެރެވުނު މިއުޅަނދަކީ، ކުރިން އިންޑިއާ ސަރުކާރުން ހަދިޔާކުރެއްވި، "ސީ.ޖީ.އެސް ހުރަވީ"ގެ ނަމުގައި ބޭނުން ކުރަމުން އައި އުޅަނދުގެ ބަދަލުގައި ދިން އުޅަދެއްކަމަށް ސަރުކާރުން ބުނެއެވެ.
އިންޑިއާ ސަރުކާރުން ރާއްޖެއަށް ހަދިޔާކުރި، އޯފްޝޯ ޕެޓްރޯލް ވެސަލްގެ އިތުރުން، ލޭނޑިން ކްރާފްޓް ދިވެހި ސަރުކާރާއި ހަވާލުކުރުމުގެ ގޮތުން އެ ދެ އުޅަނދުގެ މޮޑެލް، ޑިފެންސް މިނިސްޓަރު މާރިޔާ އަހްމަދު ދީދީއާ ހަވާލުކޮށްދެއްވީ، އިންޑިއާގެ ޑިފެންސް މިނިސްޓަރު ރަޖްނަތު ސިންގްއެވެ.
މީގެ އިތުރުން މި ރަސްމިއްޔާތުގައި ވަނީ އިންޑިއާގެ މި ހަދިޔާގެ އަގުވަޒަން ކުރައްވައި ހާއްސަ ހަނދާނީ ފިލައެއް މާރިޔާ އަޙްމަދު ދީދީގެ ފަރާތުން ރަޖްނަތު ސިންގްއަށް އަރުއްވާފައެވެ.
ރައީސް ސީޖީއެސް ހުރަވީ ބައްލަވާލައްވަނީ
އިންޑިއާ ސަރުކާރުން ހަދިޔާކުރި އުޅަނދުތަކުގެ ސަބަބުން އެމްއެންޑީއެފް ކޯސްޓްގާޑުގެ އޮޕަރޭޝަނަލް ގާބިލްކަން އިތުރުވެ ދިވެހި ރާއްޖޭގެ ދިފާއު އަދި ސަލާމަތާއި ރައްކާތެރިކަން ދެމެހެއްޓުމުގައާއި ރާއްޖޭގެ ކަނޑުގެ ސަރަހައްދުތައް ބެލެހެއްޓުމަށް ކުރާމަސައްކަތް އިތުރަށް ހަރުދަނާވެގެންދާނެކަމަށް ސަރުކަރުން ބުނެއެވެ.
ސީޖީއެސް ހުރަވީ ކަމިޝަން ކޮށްދެއްވުމަށްފަހު ރައީސް ސޯލިހްވަނީ ހުރަވީ ބައްލަވާލައްވާފައެވެ.
