އަލީ ހުސައިން މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ލ. ކުނަހަންދޫގެ ފެނާއި ނަރުދަމާގެ މަސައްކަތް ހުއްޓިފައިވާތީ އެކަން އަވަސް ކުރުމަށް ސަރުކާރަށް ގޮވާލާ ހުށަހަޅާފައިވާ ގަރާރަށް ބަހުސް ކުރުމުގެ މަރުހަލާގަ އެވެ.
މި ބަހުސްގެ މަރުހަލާގައި ގައްދޫ ދާއިރާގެ މެންބަރު އަހުމަދު ޒާހިރުގެ ވާހަކަފުޅަށް ފަހު ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވަނީ "ޖޫންޖުލައި ވިއްސާރަ" އަންނަން އުޅޭކަން އަންގައިދިނުމަށް ނައިފަރު ދޮހޮއްކޮގެ "ދިޔަވަތް ރަނގަޅު އޮޑި" މި ލަވައިގެ ބައިތެއް ވިދާޅުވެފަ އެވެ.
ރައީސް ނަޝީދު މި ބައިތާއެކު ނުސީދާކޮށް އިޝާރާތް ކުރައްވަނީ ރާއްޖޭގެ ސިޔާސީ މަޝްރަހު ކުރިއޮތްތާ ހަލަބޮލިވާނެ ކަމަށެވެ.
ރައީސް ނަޝީދުގެ ޅެންބައިތައް ފަހު ޖުމްހޫރީ ޕާޓީއަށް ނިސްބަތްވާ ކެންދޫ ދާއިރާގެ މެންބަރު އަލީ ހުސައިންގެ ވާހަކަފުޅު ފައްޓަވަމުން ވިދާޅުވީ ޖޫންޖުލައިގެ ފެށެނީ ކަމަށާއި މިއީ ސަރުކާރަށް އޮތް އެންމެ ފަހު ހުޅަނގު ކަމަށެވެ.
އަލީ ހުސައިން ވިދާޅުވީ މި ހުޅަނގު މަޑެއް ނުވާނެ ކަމަށާއި ފުދޭވަރަކަށް ގަދަ ވާނެ ކަމަށެވެ. އަދި މި ހުޅަނގުގެ ވައިގައި ސަރުކާރަށް އެއްވެސް ވަރަކަށް ހިފަހައްޓާ ނުލެވޭނެ ކަމަށްވެސް ވިދާޅުވި އެވެ.
ރާއްޖޭގެ ސިޔާސީ މަޝްރަހު ހަލަބޮލިވާނެ ކަމުގެ އިޝާރާތްތައް ސިޔާސީ ފަރާތްތަކުން ދެމުންގެންދާއިރު ރައީސް ނަޝީދުގެ "ފިކުރެއްގެ ދިރުން" ހަރަކާތުގައި އުޅުއްވި 12 މެންބަރަކު އެމްޑީޕީން ވަކިވެ މިހާރު މިވަނީ އަމިއްލަ ޕާޓީއެއް އުފައްދާ ރިޔާސީ ކެންޑިޑޭޓެއް ނެރުމަށް ތައްޔާރުވަމުންނެވެ.
މީގެ އިތުރުން އިދިކޮޅު ކޯލިޝަނުން މިވަނީ ޖުމްހޫރީ ޕާޓީއާއި އެމްއެންޕީގެ އިތުރުން އެމްއާރްއެމްއާއި ރައީސް ނަޝީދުގެ "ފިކުރެއްގެ ދިރުން" ހަރަކާތުގެ މެންބަރުންނާއިއެކު ކަނޑު ވިއްކުމާ ދެކޮޅު ހަރަކާތްތަކެއްވެސް ހިންގަމުންނެވެ.
