އެ ފިލްމު އެޅުވުމަށް މަސައްކަތް ކޮށްފައިވަނީ ހއ. ދިއްދޫގައި ހުންނަ އެއަތޮޅު ތައުލީމީ މަރުކަޒުގައެވެ. އެ މަރުކަޒުން އެންމެ ފުރަތަމަ އެ ފިލްމު އަޅުވަން ހުއްދަ ދިން ކަމަށް ފިލްމުގެ ޑައިރެކްޓަރު ވިޝާލް ޒަކީ (ވިއްޓެ) ސީއެންއެމްއަށް މިކަމާ ގުޅިގެން ވާހަކަ ދައްކަމުން ބުންޏެވެ. ނަމަވެސް ދުވަސް ކައިރިކޮށް ހުއްދަދެވެން ނެތްކަމަށް އަންގާފައިވާކަމަށް ވެސް އޭނާ ބުންޏެވެ.
ހޯލު ދޫނުކުރެވެނީ ކޮން ސަބަބަކާ ހުރެކަމެއް އެ ސްކޫލުން އަންގާފައެއް ނުވެއެވެ. ނަމަވެސް ރާއްޖޭގެ ސްކޫލުތަކުން އަމަލުކުރާ އާންމު އުސޫލަކީ ސްކޫލު ހޯލު ދޫނުކުރެވޭނަމަ ސްކޫލު ހޯލު ދޫނުކުރެވޭ ސަބަބާއި، ދެން ހޯލު ލިބޭނެ ދުވަހަކާއެކު އެންގުމެވެ.
ޕާޓިކަލް ސްޓޫޑިއޯ" އާއި "ދަ ސްޓޫޑިއޯ" ގެ އިތުރުން "ވާންޗޯ އެންޓަޓެއިންމެންޓްސް" ގުޅިގެން ތައްޔާރުކޮށްފައިވާ މި ފިލްމަށް އެތައް ބައެއްގެ ސަޕޯޓު ލިބިފައިވެއެވެ. "ވަނާޖުބޭސާ" ވަނީ ރާއްޖޭގެ ބައެއް ރަށްރަށުގައި ވެސް އަޅުވާފައެވެ. އެގޮތުން ފ. ނިލަންދޫ، ނ. ކެނދިކުޅުދޫ، ބ. ދޮންފަނާއި ބައެއް ރިސޯޓުތަކުގައި ވެސް މި ފިލްމު އަޅުވާފައިވާއިރު، އެއިން ކޮންމެ ޝޯއެއްވެސް ހައުސް ފުލްއެވެ.
ކާއްޓޭ އަދި މަޓޭގެ އިތުރުން، "ހާދަރު" ފިލްމުގެ ރޯލުން ފެނުނު، މުހައްމަދު ސައީދު ވެސް މި ފިލްމުގެ ފެނެއެވެ.
މިއީ ފ. ނިލަންދޫ އާއި ފީއަލީގައި ޝޫޓުކުރި ފިލްމެކެވެ. ލީޑުން ފެންނަ ތިން އެކްޓަރުންގެ އިތުރުން ދެން ތިބި އެކްޓަރުން ހޮވާފައިވަނީ ޝޫޓުކުރި ރަށްރަށުންނެވެ.
މި ފިލްމު ޕްރިމިއާ ކޮށްފައިވަނީ އޭޕްރީލް މަހު 25 ވަނަ ދުވަހުގެ ރޭ، އޮލިމްޕަސް ސިނަމާގަ އެވެ. އަދި ޕްރިމިއާ ކުރާ ދުވަހުން ފެށިގެން އެމަހުގެ ނިޔަލަށް އެޅުވި ހުރިހާ ޝޯއެއްވެސް ހައުސް ފުލްއެވެ.
ފިލްމު ލިޔެ ޑައިރެކްޓު ކުރުމުގެ އިތުރުން ފިލްމުގެ ސިނަމަޓޯގްރަފީ އަދި އެޑިޓިންގެ މަސައްކަތް ވެސް ކޮށްފައި ވަނީ ވެސް ވިއްޓެ އެވެ. ވަނާޖު ބޭސާ ވަރަށް އަވަހަށް ބައިސްކޯފަށް އަންނާނެކަން ވެސް ވަނީ ބުދަ ދުވަހު ވަމީ އިއުލާނުކޮށްފައެވެ.
