ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ މައްސަލައިގެ ޝަރީއަތުގެ މަރުހަލާގައި ގިނަ ވަގުތުތަކެއް ހޭދަވުމާ ގުޅިގެން ޕީޕީއެމްއާއި އެކޮމިޝަނާ ދެމެދު ހިނގި ކަންކަމާ ގުޅޭ ގޮތުން ސީއެންއެމްއާ ވާހަކަ ދައްކަވަމުން އެކޮމިޝަނުގެ ރައީސް މަރިޔަމް މުނާ ވިދާޅުވީ ކަމެއް ހިނގިކަން އެކޮމިޝަނަށް އެނގުމާއެކު އެކަމެއްގެ ހަގީގަތް ބަލަމުން ގެންދާ ކަމަށެވެ. އަދި އެ ހަގީގަތްތައް ހިމެނޭ މައުލޫމާތަށް ބިނާކޮށްގެން ނޫނީ ބަޔާނެއް ނެރުން ނުވަތަ ފިޔަވަޅެއް އެޅުންފަދަ ކަމެއް ނުކުރެވޭނެ ކަމަށެވެ.
ރައީސް ޔާމީނުގެ މައްސަލައިގައިވެސް އެކޮމިޝަނުގެ ކަންބޮޑުވުން އެބަހުރި ކަމަށާއި، އެހެންނަމަވެސް އެކޮމިޝަނުގެ ދައުރު އަދާ ކުރުމަށް އެކަން ހިނގާދިޔަ ގޮތް ބެލުމަށްޓަކައި ވަގުތުވެސް ބޭނުންވާކަމަށް އެކޮމިޝަނުން ބުނެއެވެ.
މުނާ ވިދާޅުވީ އެކަމާ ގުޅިގެން އެޗެއް ދަންނަވަން އެނގޭނީ މައުލޫމާތުތައް އެއްކޮށްގެން ކަމަށާއި އަދި އެމައުލޫމާތު އެއްކުރަން ވަގުތުވެސް ނަގާނެ ކަމަށެވެ.
ރައީސް ޔާމީނާ ގުޅޭގޮތުން ހުށަހަޅާފައިވާ މައްސަލާގައި ހިއުމަން ރައިޓްސް ކޮމިޝަނުގެ މަސްއޫލިއްޔަތަކީ ހައްގުތައް ކަށަވަރު ކޮށްދިނުމަށްޓަކައި ހުރި މުއްއަސަސާތަކުން އަމަލު ކުރި ގޮތަކުން ހައްގެއް ގެއްލިފައިވޭތޯ ބެލުން ކަމަށެވެ. އެހެންވެ، އެންމެ ފުރަތަމަ އެކަމާ ގުޅޭ ޕްރައިމަރީ އޮތޯރިޓީން ކުރީ ކޮންކަމެއްތޯ އެކޮމިޝަނުން ބަލަން ޖެހޭ ކަމަށެވެ.
ހިއުމަން ރައިޓްސް ކޮމިޝަނުގެ މަސައްކަތް ކުރިއަށްދާ ގޮތުގެ މިސާލެއް ދައްކަވަމުން މުނާ ވިދާޅުވީ އެ ކޮމިޝަނުގެ މަސައްކަތްތައް އާންމުން ވިސްނަނީ އެހެން ގޮތަކަށް ކަމަށެވެ.
ރައީސް ޔާމީންގެ ޝަރީއަތް މެދު ނުކެނޑި ގިނަ ވަގުތުތަކެއް ހޭދަވެފައިވާތީ ޕީޕީއެމްއިން ވަނީ ހިއުމަން ރައިޓްސް ކޮމިޝަނާ ބައްދަލު ކޮށްފައެވެ. އަދި އެ ބައްދަލު ވުމަށްފަހު އެ ޕާޓީން ބުނެފައިވަނީ އެކޮމިޝަނުގެ މެންބަރުންގެ މައްޗަށް އިތުބާރު ނެތް ކަމަށާއި އިތުބާރު ނެތް ކަމަުގެ މައްސަލަ ރައްޔިތުންގެ މަޖިލީހަށް ހުށަހަޅާނެ ކަމަށެވެ.