ރާއްޖެއަށް ފަތުރުވެރިކަން އާލާވެ، ރާއްޖޭގެ ރަށްރަށުގައި ގެސްޓުހައުސްތައް އެޅުމާއެކު، ރަށްރަށުގައި ހުރި ޗަކަ ގަނޑުތަކަކީ ވެސް "ސުވަރުގެއެއް" ފަދަ ދިވެހިރާއްޖޭގެ މަޖާ އަދި ފައިދާ ހުރި ތަންތަންކަމަށް ވަނީ ވެފައެވެ.
ފުވައްމުލަކުގައި އިހު ޒަމާނުއްސުރެ "ޗަކައިން ފެންވެރުމުގެ" ސަގާފަތެއް ގެންގުޅެއެވެ. އެގޮތުން އާއިލާއާއި ރަހުމަތްތެރިން އެންމެން ގޮސް ޗަކަގަނޑަކަށް އެރި މަޖާކޮށްހަދައެވެ. އެ ސިޓީން މިހާރު އަންނަނީ މިގޮތަށް ޗަކަގަނޑަށް އެރުމަކީ ވެސް "ތެރަޕީއެއްގެ ގޮތުގައި" ތައާރަފްކުރަމުންނެވެ.
މިކަންކަން ވެފައިވަނީ ފަތުރުވެރިންނަށްވެސް ރަނގަޅު އަދި މަޖާ ތަޖުރިބާއަކަށެވެ. އެގޮތުން ފުވައްމުލަކުގެ ބައެއް ގެސްޓުހައުސްތަކުން މިހާރު "މަޑް ތެރަޕީ" ނަމުގައި ޗަކަގަނޑަށް އެރުމުންވެސް އަންނަނީ އިޝްތިހާރުކުރަމުންނެވެ.
މިގޮތުން ކޮށްފައިވާ ބައެއް އިޝްތިހާރުތަކުން "މަޑް ތެރަޕީ" ނުވަތަ ޗަކަ ގަނޑަށް އެރުން އެއީ ހަނގަނޑު "އެކްސްފޯލިއޭޓް" ނުވަތަ މަރުވެފައިވާ ސެލްތައް ނައްތާލަން އެހީވެދޭ ކަމެއްކަމަށް ބުނެފައިވެއެވެ.
ޗަކަ އަކީ އެއް ޒަމާނެއްގައި ހަޑި އެއްޗެއްގެ ގޮތުގައި ދެކުނު ނަމަވެސް، މިހާރު ޗަކައަކީ ވެސް ދިވެހިރާއްޖެއަށް ފައިސާ ވެއްދިދާނެ ވަސީލަތެއްކަން މި އަންނަނީ ހާމަވަމުންނެވެ.
