މިގޮތުން ޔޯގާ ޑޭ މި ފަހަރު ފާހަގަކޮށްފައިވަނީ ހުޅުމާލޭގައި ހުންނަ އިންޑިއާގެ ހައިކޮމިޝަނުގެ ތެރޭގައި މިއަދު ކަމަށް ރިޕޯޓުތައް ބުނެއެވެ.
އެ ދުވަސް ފާހަގަކުރަމުން ދިޔައިރު ފުލުހުން މަގު ބަންދުކޮށްގެން ސެކިއުރިޓީ ފޯރުކޮށްދިންކަމަށް ވެސް މަންޒަރު ދުށް މީހުންނާއި ހަވާލާދީ ބައެއް ނޫސްތަކުން ވަނީ ރިޕޯޓުކޮށްފައެވެ.
ނަމަވެސް ރާއްޖޭގައި ޔޯގާޑޭ ފާހަގަ ކުރިކަމެއް ނުވަތަ ނޫންކަމެއް ސަރުކާރުން ހާމައެއް ނުކުރެއެވެ.
މިދިޔަ އަހަރުގެ ޖޫން 21 ވަނަ ދުވަހު ގައި "އިންޓަނޭޝަނަލް ޔޯގާ ޑޭ" ފާހަގަ ކުރުމަށް ޔޫތު މިނިސްޓްރީންނާއި، އިންޑިއަން ހައި ކޮމިޝަނާއި އިންޑިއަން ކަލްޗަރަލް ސެންޓަރު ގުޅިގެން ގަލޮޅު ދަނޑުގައި ކުރިއަށް ގެންދިޔަ އިވެންޓު ތެރެއަށް ބަޔަކު ވަދެގަނެ ހަމަނުޖެހުން ހިންގައި މާރާމާރީ ހިންގާފައިވެއެވެ.
މާލޭގައި ބޭއްވި ޔޯގާ ހަރަކާތް ހުއްޓުވަން ހިންގި ހަމަނުޖެހުމާއި ގުޅިގެން ފުލުހުންގެ ބެލުމުގެ ދަށަށް ގެންދިޔަ، އައްޝައިހް އާދަމް ނިޝާން ވަނީ މަހެއްހާ ދުވަހު ބަންދުގައި ބެހެއްޓުމަށް ފަހު ދޫކޮށްލާފައެވެ.
ނިޝާން ހައްޔަރު ކޮށްފައިވަނީ، ޔޯގާ ޑޭ ހަމަނުޖެހުމާއި ގުޅުގެން އޭގެ އަނެއް ދުވަހުގެ ރޭގަނޑުގެ ވަގުތެއްގައެވެ.
މި މައްސަލަ އާއި ގުޅިގެން ފުލުހުން ވަނީ ގިނަ ބަޔަކު ހައްޔަރު ކޮށްފަ އެވެ. އޭގެ ތެރެއިން ބައެއް މީހުން ބަންދުން ދޫކޮށްލާފައި ވާއިރު، އަދިވެސް ބައެއް މީހުން ބަންދުގައި އެބަތިއްބެވެ.
މިދިޔަ އަހަރު ޔޯގާ ޑޭ ފާހަގަކުރުމަށް ގަލޮޅު ދަނޑުގައި ބޭއްވި ހަރަކާތް ހުއްޓުވާ ހިނގި ހަމަނުޖެހުމުގައި، އެތަނުގެ ތެރެއަށް ވަދެ ބައެއް މީހުން ވަނީ ތަނުގެ ތެރޭ ހުރި ތަކެއްޗަށް ގެއްލުންދީ، އެތަނުގައި ތިބި ފަރާތްތަކަށް ބިރު ދައްކާފައެވެ.
